ԱԱԾ տնօրենների փոփոխություններից պետությունը չի կարող շահել. Երվանդ Վարոսյան
ԱԱԾ տնօրենների փոփոխություններից պետությունը չի կարող շահել՝ անկախ նրանից՝ նոր նշանակված անձը փորձառու է, թե ոչ: Այս փոփոխությունները պետությանը որևէ լավ բանի չեն բերելու։ Այս մասին Tert.am-ի հետ զրույցում նշեց փաստաբան Երվանդ Վարոսյանը՝ անդրադառնալով Ազգային անվտանգության ծառայության տնօրենի ժամանակավոր պաշտոնակատար Միքայել Համբարձումյանի աշխատանքից ազատման հանգամանքին:
«Բացի նախկին ԱԱԾ տնօրեն Արթուր Վանեցյանի ազատման դեպքից, բոլոր ԱԱԾ տնօրենների աշխատանքից ազատման պատճառների մասին մենք որևէ տեղեկություն չունենք: Արթուր Վանեցյանի պարագայում էլ, որոշ տեղեկություն ունենք, որովհետև ինքը հայտարարեց: Մնացած դեպքերում հասարակության համար պատճառները մութ են մնում: Չի կարող նման իրավիճակ լինել, երբ 2,5 տարվա մեջ ԱԱԾ-ն ունեցել է հինգ տնօրեն։ Սա վկայում է այն մասին, որ խնդիրը ԱԱԾ-ում և տնօրենների մեջ չէ․ կադրերին նշանակելիս պետք է յոթ անգամ մտածել, նոր նշանակել, ոչ թե նշանակել և յոթ անգամ մտածել»,- նշեց Երվանդ Վարոսյանը:
Նշենք, որ ԱԱԾ տնօրենի ժամանակավոր պաշտոնակատար Միքայել Համբարձումյանը, անդրադառնալով իր աշխատանքից ազատման հանգամանքին, նշել էր, որ դեռևս հոկտեմբերի 28-ին դիմել է ՀՀ վարչապետին՝ աշխատանքից ազատման խնդրանքով, որին սակայն այդ պահին ընթացք չի տրվել: Նրա փոխանցամամբ՝ վարչապետը նրան առաջարկել է ծառայությունը շարունակել տնօրենի տեղակալի՝ իր նախկին պաշտոնում, որին Միքայել Համբարձումյանը չի համաձայնվել:
Հիշեցնենք, որ հոկտեմբերի 8-ին ՀՀ նախագահի հրամանագրով աշխատանքից ազատվել էր ԱԱԾ պետ Արգիշտի Քյարամյանը, նրա փոխարեն ԱԱԾ տնօրենի պաշտոնակատար էր նշանակվել Միքայել Համբարձումյանը:
ՀՀ նախագահ Արմեն Սարգսյանի հրամանագրով ՀՀ ազգային անվտանգության տնօրեն է նշանակվել Արմեն Աբազյանը:










