Վերջին 2.5 տարում բանակը մշտապես եղել է Կառավարության ուշադրության կենտրոնում, գուցե այս պատերազմի համատեքստում կատարված միջոցառումներից ոչ բոլորն են բավարար չափով արդյունավետ եղել. Նիկոլ Փաշինյան
Բանակի զարգացման համար մենք վերջին 2.5 տարվա ընթացքում բազմաթիվ միջոցառումներ ենք իրականացրել, գուցե այս պատերազմի համատեքստում այդ միջոցառումներից ոչ բոլորն են բավարար չափով արդյունավետ եղել: Այս մասին ֆեյսբուքյան ուղիղ եթերի ընթացքում հայտարարեց ՀՀ վարչապետ Նիկոլ Փաշինյանը:
«Գուցե կարելի էր ոչ թե «Ա» միջոցառումն իրականացնել, այլ «Բ» միջոցառումը իրականացնել, և այդ պարագայում այս պատերազմի տրամաբանությամբ գուցե ամեն ինչ ավելի արդյունավետ կլիներ: Բայց որ վերջին 2.5 տարվա ընթացքում բանակը մշտապես եղել է Կառավարության ուշադրության կենտրոնում, դա փաստ է: Այո՛, մենք չենք կարողացել բանակի վրա դնել այնքան գումար, ինչքան մենք ցանկանում էինք դնել»,-ասաց վարչապետը:
Նա նշեց՝ տարբեր առիթներով խոսել է քաղաքացու հարկային գիտակցության, ՀԴՄ-ների մասին. «Նույնիսկ ասել եմ՝ նրանք, ովքեր ՀԴՄ չեն տպում, չեն վերցնում, պահանջում, զինվորի հացն են գողանում»։
Ըստ Փաշինյանի՝ չեն կարողացել կոռուպցիոն գործերով բավարար միջոցներ գեներացնել, գոնե՝ 1-1.5 մլրդ դրամ և դա ծառայեցնել բանակի նպատակներին, բայց այդ պլանը եղել է և շարունակում է գոյություն ունենալ:
«Այս իրավիճակում մեզ մնում է կենտրոնանալ Հայաստանի և Արցախի՝ տնտեսապես, ինտելեկտուալ, կրթական առումով ուժեղացման վրա՝ արձանագրելով, որ այո՛, մենք ընկել ենք, բայց չենք ծնկել, կանգնել ենք «տղամարդավարի»՝ բառիս ամենաբուն իմաստով մինչև ամենավերջին «խազը» և այդտեղ կայացրել ենք որոշում՝ անդունդը չգլորվելու համար»,-ասաց նա՝ ընդգծելով, որ դա եղել է ցավոտ, բայց անհրաժեշտ ու անխուսափելի որոշում, որովհետև դրա չլինելու դեպքում մեր իրադրությունը լինելու էր շատ ավելի վատ:
«Սա մեծ անհաջողություն է մեզ համար, մեծ աղետ, սուգ, բայց ես հավատում եմ, որ Հայաստանը պետք է ապրի, Արցախը պետք է ապրի, և մենք պետք է ուժեղանանք, հզորանանք, գուցե որոշակիորեն վերանայենք մեր նախկին ընկալումները ամենատարբեր հարցերի վերաբերյալ: Պետք է կարողանանք մեր փորձից դասեր քաղել, որոնք պետք է լինեն կառուցողական և ծառայեն մեր հայրենիքին, մեր ժողովրդին, մեր ապագային»,-հայտարարեց Նիկոլ Փաշինյանը:










