«Օր առաջ Նիկոլ Փաշինյանի հեռացմամբ փրկել հայրենիքը»․ քաղաքացիներն ու քաղաքական գործիչները դադարեցնում են հանրահավաքը՝ վաղը այն վերսկսելու որոշմամբ (տեսանյութ)

12:40 • 11.11.20

20։31

Հանրահավաքը դադարեցվեց և կշարունակվի վաղը։




19։30
ՀհհԱՆՀա

Լրագրողների հետ զրույցում Սաղաթելյանը նշեց, որ երաշխիք չկա, որ Իմ քայլից այդ 25 պատգամավորները կգան ԱԺ նիստին:

Նա ասաց, որ երկու գործողության պետք է սպասեն՝ ԱԺ նիստին ժամը 20:00-ին և ժամը 00:00-ին՝ Նիկոլի Փաշինյանի հրաժարականին, եթե այդ երկու գործողությունները տեղի չունենան, ապա իրենք ժամը 00:30-ին կներկայացնեն իրենց քայլերը:

Ժողովուրդն էլ արձագանքեց, որ բոլորը մնալու են այդտեղ:

17։06

Հանրահավաքի մասնակիցները Ազգային ժողովի դիմաց են, որտեղ կրկին վանկարկում են «Նի-կոլ, դա-վաճ-ան»: Նրանք պահանջում են առաջիկա ժամերի ընթացքում հրատապ գումարել Ազգայի ժողովի նիստ, քննարկել Նիկոլ Փաշինյանի պաշտոնանկության հարցը, նրանք նաև կոչ արեցին «Լուսավոր Հայաստան» խմբակցությանը միանալ իրենց։

«Բարգավաճ Հայաստան» խմբակցության պատգամավորները փորձում են մուտք գործել Ազգային ժողով և հորդորեցին Ոստիկանությանը` չխոչընդոտել իրենց մուտքը, ինչպես նաև ԱԺ հավատարմագրված լրագրողների մուտքը:


16:08

Կառավարության շենքի մոտից հանրահավաքի մասնակիցները` Ամիրյան-Մաշտոց-Բաղրամյան փողոցով շաժվում են դեպի Ազգային ժողով`պահանջելու ԱԺ հրատապ նիստ:

15։37

Ազատության հրապարակի հանրահավաքի մասնակիցները երթով հասան Կառավարության շենք, որտեղ ոստիկաններն արդեն պատ են կազմել:  Նրանք վանկարկում են «Նի-կոլ, դա-վաճ-ան»:

15։27

Ինձ հրավիրել են ԱԱԾ՝ քրեական գործի շրջանակում հարցաքննելու համար: Միջոցառման ավարտից հետո ներկայանալու եմ ԱԱԾ քննչական դեպարտամենտ և տալու եմ համապատասխան պարզաբանումներ: Այս մասին Ազատության հրապարակից դեպի Կառավարության շենք երթի ընթացքում հայտարարեց «Հայրենիք» կուսակցության ղեկավար Արթուր Վանեցյանը:

Վանեցյանը նաև հայտարարեց՝ Նիկոլ Փաշինյանը մի մարդ է, որ ձախողել է գործընթացները: «Նա ցույց տվեց, որ ոչ մի քայլ չկարողացավ ձեռնարկել և այդ դավաճանական փաստաթուղթը չստորագրել: Պետք են նոր բանակցություններ, իսկ նոր բանակցությունների համար՝ նոր բանակցող»,-ասաց նա:

Ըստ Վանեցյանի՝ իշխանությունները, մեղքը բարդելով ուրիշների վրա, փորձում են իրենց դավաճանական պլանը կյանքի կոչել: «Միակ մեղավորը գործող իշխանություններն են: Հայաստանում պարտվել է միայն Նիկոլ Փաշինյանը, և վերջ»,-ասաց նա:

Հիշեցնենք, որ Ազատության հրապարակում պետք է կայանար հանրահավաք՝ Նիկոլ Փաշինյանի հրաժարականի պահանջով, սակայն մինչ հանրահավաքի մեկնարկը՝ սկսվեցին զանգվածային ձերբակալություններ, բազմաթիվ քաղաքական ու հասարակական գործիչներ արդեն բերման են ենթարկվել: Այս պահին հանրահավաքի մասնակիցները երթով գնում են Կառավարության շենքի մոտ:

15:17

Ազատության հրապարակի հանրահավաքի մասնակիցները երթով շարժվում են դեպի կառավարություն` պահանջելով վարչապետ Նիկոլ Փաշինյանի հրաժարականը, դրան զուգահեռ հանրահավաքի մասնակիցները պահանջում ենք ԱԺ հրատապ նիստ:

Ոստիկանությունը երկխոսություն սկսեց ՀՅԴ-ական Իշխան Սաղաթելյանի հետ:

15։11

Այսօր համայն հայությունն ունի մեկ կարևոր, գլխավոր նպատակ՝ փրկել Արցախը: Այս մասին Ազատության հրապարակում հանրահավաքի ժամանակ հայտարարեց ՀՅԴ ԳՄ ներկայացուցիչ Իշխան Սաղաթելյանը:

«Արցախը փրկելու համար մենք այս պահին ձևավորում ենք հայրենիքի փրկության կոմիտե, ողջ հայ ժողովրդին, համայն հայությանն ասում ենք՝ ոտքի կանգնեք, փրկենք Արցախը: Արցախը փրկելու համար կա մեկ գլխավոր խոչընդոտ, նրա անունը Նիկոլ է: Պետք է արագ, անհապաղ ազատավել նրանից՝ ազգի չարիքից»,- ասաց նա:

Սաղաթելյանն ընդգծեց՝ սա անձերի պայքար չէ, սա իշխանության համար պայքար չէ, սա կուսակցական պայքար չէ, սա Արցախը փրկելու պայքար է: «Թուրքի առաջ «կզած» Հայաստանի ղեկավարը պետք է հեռանա, այս կինն իր տունն է ուզում Հադրութում, մյուսը՝ Ասկերանում, Նիկո՛լ, տուր այս մարդկանց տները»,- ասաց նա:

ՀՅԴ-ականը նշեց, որ ունեն երկու կարևոր գործողություն Արցախը փրկելու համար. առաջինը՝ պետք է ազատվել Արցախը հանձնող իշխանություններից, և պետք է ձևավորվի ազգային համաձայնության կառավարություն, համախմբել ժողովրդին, վերջ տալ պառակտումներին, ջլատումներին՝ փրկելով Հայաստանն ու Արցախը: «Սա է մեր ծրագիրը: Այս պահից գործում է հայրենիքի փրկության կոմիտեն: Կոչ ենք անում ողջ ժողովրդին, համայն հայությանը, ոտքի կանգնել: Այո, սա նաև անհնազանդության շարժում է, մենք չենք կարող նման ղեկավարին հանդուրժել, այս մարդն անելիք չունի: Պատերազմը բերել է Նիկոլը՝ իր անհետևողական քաղաքականության արդյունքում, փչացրել է մեր հարաբերությունները մեր ռազմավարական դաշնակցի հետ, Թեհրանի հետ: Ամբողջ աշխարհից մեկուսացրել է մեզ, իր ստի, կեղծիքի պատճառով բերել, հանգեցրել է պատերազմի, իսկ պատերազմի ողջ ընթացքում մատնված է եղել անգործության և դավաճանության: Այս պահից սկսած՝ ՀՀ իշխանությունը գոյություն չունի, պետք է հեռանա, որ փրկենք Հայաստանը և Արցախը, Նիկոլը չի կարող սա կանգնացնել, սա կանգնեցնելու համար պետք է ձերբակալի երեք մլն բնակչությանը, ուրիշ տարբերակ չունի»,- ասաց նա:

Նրա խոսքով՝ այս ամենի համար պատասխանատվություն ունի նաև իշխանական մեծամասնությունը և պետք է արագ հրավիրել ԱԺ արտահերթ նիստ և հեռացնել Նիկոլին: «ԲՀԿ-ն դա նախաձեռնել է, ԼՀԿ-ն պարտավոր է միանալ այս նախաձեռնությանը, այլ տարբերակ չկա: Նիկոլը բարոյական, քաղաքական որևէ իրավունք չունի ղեկավարելու մեր ժողովրդին, նա մեզնից խլեց մեր արժանապատվությունը, ինքնասիրությունը, նա պետք է հեռանա ու պատասխանատվություն կրի դրա համար»,- եզրափակեց նա:

14։58

Նիկոլ Փաշինյանի ստորագրած փաստաթուղթը չի արտահայտում Հայաստանի և Արցախի ժողովրդների շահերը, ինչպես նա բազմիցս խոստացել էր: Այս փաստաթուղթը ստորագրվեց գաղտնիության պայմաններում, եթե իրոք սա էր միակ ելքը, և այս փաստաթղթով պետք է  ազգի կործանումը կանխվեր, կարծում եմ՝ իրավունք ունեինք լսելու փաստարկները և մեր որոշումով գնալ այս քայլին:

Այս մասին Ազատության հրապարակում անցկացվող հանրահավաքի ժամանակ ասաց ՀՀ Փաստաբանների պալատի նախագահ Արա Զոհրաբյանը:

«Որևէ կուսակցության չեմ հարում, նախորդ իշխանություններին էլ եմ քննադատել, ներկայիս իշխանություններին էլ: Ես այստեղ եմ՝ չկիսելով որևէ կուսակցական գաղափար, ես այստեղ եմ, որովհետև լուրջ վտանգ եմ տեսնում: Նիկոլ Փաշինյանի ստորագրած փաստաթղթում Արցախի կարգավիճակի մասին որևէ խոսք չկա, ավելին՝ կան վտանգավոր ձևակերպումներ»,-ասաց նա և ներկայացրեց այն կետերը, որոնք փաստաթղթում կան, որը ցույց է տալիս, որ Արցախի հարցը չի լուծվել, և ադրբեջանաթուրքական ագրեսիան չի կանխվել, իսկ պատերազմը ապագայում Հայաստան է գալու:

14։39

Ցավոք սրտի, մենք չկարողացանք կանխել մեր դավաճանական իշխանությունների, արյունով գծված մեր սահմանների, մեկ գրիչ հարվածով թուրքին հանձնելու դավադիր ծրագիրը. «Ազատության» հրապարակում վարչապետի հրաժարականը պահանջող հանրահավաքի ժամանակ նշեց ԱԱԾ  նախկին տնօրեն Արթուր Վանեցյանը:

«Մեկ տարի առաջ ես հրապարակային կոչ արեցի, ասացի՝ Նիկոլ, կանգ առ, երկիրը տանում ես կործանման, չլսեց եկանք հասանք այս հանգրվանին: Այսօր ևս մեկ անգամ ասում եմ՝ Նիկոլ, կանգ առ, մի ծախիր մեր երկիրը: Այստեղ մենք հավաքվել ենք ոչ թե իշխանափոխության համար, այլ մեկ նպատակով՝ մեր երկիրը, մեր Արցախը, մեր ինքնությունը փրկելու։ Հայ ազգը չի ընկրկելու, հայ ազգը հաղթելու է»,- հայտարարեց նա:

Արթուր Վանեցյանը նշեց, որ իրենք շարունակելու են հանրահավաքն այնքան ժամանակ, մինչև հասնեն երկրի փրկությանը, քանի որ ամեն օրը, ամեն ժամը կործանարար կարող է լինել հայ ազգի համար.

«Այն դավադիր ուժերը, գործակալական ցանցերը, որոնք երկուսուկես տարիների ընթացքում փորձում էին ոչնչացնել, մեր ազգային ինքնությունը, ոչնչացնել մեր ազգային արժեքները, այսօր կարճ ճանապարհով, հրահրած պատերազմի արդյունքում, 44 օր բոլորին խաբելով, կործանեցին, կոտորեցին հազարավոր երիտասարդների: Մենք իրավունք չունենք մեր երեխաների, մեր հայրերի համար այստեղից գնալու և պայքարում ենք մինչև վերջ, և այդ վերջը շատ մոտ է»:

14։30

Սիրելի՛ հայրենակիցներ, մենք ձեզ հետ միասին վերականգնում ենք հայ ազգի արժանապատվությունը, մենք ձեզ հետ միասին պետք է պահանջենք անցնցում, անարյուն իշխանափոխություն: Այս մասին Ազատության հրապարակում հայտարարեց ՀՅԴ ԳՄ անդամ Արծվիկ Մինասյանը։

«Թող բոլորը գան Ազատության հրապարակ, միանան պայքարին, պահանջեն, որ Նիկոլ Փաշինյանը հեռանա: Նա այլևս իրավունք չունի ղեկավարել Հայաստանը»,-ասաց Մինասյանը:

Դիմելով ոստիկանապետին, ոստիկանությանը, ԱԱԾ աշխատակիցներին՝ Մինասյանը հայտարարեց.

«Սիրելի՛ սպաներ և զինվորներ, սա Հայաստանի հպարտ ժողովրդի արժանապատվության պայքարն է, դուք պետք է կանգնեք մեր կողքին: Միացեք մեզ, միացեք մեր ժողովրդին, մեր ազգին, որդեկորդույս ծնողներին: Միացեք, որ կարողանանք փրկել մեր հայրենիքը, որ այսօր զոհասեղանին է դրված, բզկտման է դրված: Այսօր հայ ժողովրդի վաղվա օրը, ապագան է վատանգված: Եթե արժանապատվություն կա, եթե դուք ձեր ուսադիրների տերն եք, խնդրում եմ, պահանջում եմ՝ միացեք մեր պահանջին»,-ասաց նա:

14։23

Ժողովուրդ, հանկարծ ոչ մի անկարգության, ոչ մի սադրանքի չտրվեք, փոխված, շորերը փոխած խուժաններ կան արդեն, սադրում են, չտրվեք այդ սադրանքներին, այսքան մարդ գալիս է ու գալու է միայն մեկ պատճառով՝ մենք թուրքին հանձնելու հող չունենք: Այս մասին ազատության հրապարակում բողոքի ակցիայի ժամանակ ասաց «Բարգավաճ Հայաստան» խմբակցության քարտուղար Արման Աբովյանը:

«Անցնող շուրջ 50 օրերի ընթացքում Արցախի, մեր հայրենիքի անվտանգության համար մեր բոլոր համերկրացիները թև թևի էին տվել, մենք դարձել էինք մեկը՝ մեկ հայություն աշխարհի բոլոր անկյուններում, ամեն մեկս հպարտանում, հուզվում, ուրախանում էր, մենք գտանք, որ մենք բոլորս մեկ ենք, բայց եկավ մի ճակատագրական օր, մեր ժողովրդի թիկունքից հարվածեցին, և հարվածեց մեկ մարդ, մեկ մարդ հարվածեց մեկ գրիչով, մեկ մարդ դավաճանեց, ինքն էր սիրում ասել, և այդ մեկ մարդը դու ես: Այո, այդ մեկ մարդը, դավաճանած մարդը Նիկոլ Փաշինյանն է»,- հայտարարեց նա:

13:50

«Հայաստանի Հելսինկյան կոմիտե» ՀԿ նախագահ, իրավապաշտպան Ավետիք Իշխանյանը ֆեյսբուքյան իր էջում գրել է, որ ինքը ևս ձերբակալվել է:

«Ինձ ձերբակալեցին։ Մի անհանգստացեք, իսկ դուք', Արցախ հանձնողներ, հրճվեք»,- գրել է նա:

13։37

Ակցիային են մասնակցում նաև արցախցիները, որոնք մեղադրում են Նիկոլ Փաինյանին իրենց տները վաճառելու մեջ: «Արցախը մառանալու չի: Գալու են, քեզ քո թաքնված տեղից գտնելու են, դուրս ես գալու, այ դավաճան, սրիկա: Քեզ, քո ամբողջ ընտանիքին նույն հրապարակում, այսքան ժողովրդի առաջ վառելու ենք»,-ասաց արցախցի կանանցից մեկը:



11։16

Ոստիկանությունը շարունակում է Ազատության հրապարակից քաղաքացիներին, հասարակական, քաղաքական գործիչներին բերման ենթարկել:

Ազատության հրապարակում աստիճանաբար քաղաքացիների թիվը ավելանում է, նրանք վանկարկում են «Նի-կոլ դա-վա-ճան»:

Նշենք, որ ոստիկանները բերման ենթարկեցին ԲՀԿ-ական պատգամավոր Արման Աբովյանին, ՀՅԴ-ական Արծվիկ Մինասյանին, Աշոտ Մինասյանին:



13:00

Ազատության հրապարակում ծեծկռտուք է սկսվել: Ակցիայի մասնակիցներին բերման ենթարկելու ընթացքում Մաշտոցի պողոտայում խցանում է, արգելք է ստեղծվել նաև լրագրողների աշխատանքի համար:  Ոստիկանները բերման ենթարկեցին նաև Բնապահպանության նախկին նախարար Վարդան Այվազյանին, ՀՀԿ-ական Հայկ Մամիջանյանին, Կարինե Աճեմյանին և նրա ամուսնուն, իրանագետ Վարդան Ոսկանյանին, ՀՀԿ-ական Վարհրամ Բաղդասարյանին և քաղաքական-հասարակական գործից Միհրան Հակոբյանին:

Ակցիայի մասնակիցները պնդում են՝  «Փաշինյանը երկիրը ծախել է», իսկ ոստիկանների այս գործողությունները վկայում են այն մասին, որ նրանք համաձայն են վարչապետի քայլերի հետ:

Ակցիայի մասնակիցների հետ են նաև ԲՀԿ-ական պատգամավորները: Իվետա Տոնոյանը լրագրողների հետ զրույցում ասաց, որ ժողովուրդ իրավունք ունի իր բողոքի ձայնը բարձրացնելու, սակայն իշխանությունները ևս մեկ անգամ նախընտրեցին Գագիկ Ծառուկյանին բերման ենթարկել: Այս պահին Ծառուկյանը ԱԱԾ-ում է, որը ըստ Տոնոյանի՝ Արցախի խնդրի լուծում չէ:

«Ամենավտանգավոր մարտերի ընթացքում Նիկոլ Փաշինյանը մի քանի օր չկար, անգամ իր սիրելի ֆեյսբուքյան ակտիվությամբ հանդես չէր գալիս: Ինչպե՞ս իրավիճակին տիրապետի վարչապետը, երբ Շուշիի մարտերի մասին խոսելիս ասում է՝ չեմ հիշում, թե որ օրն էր, երբ Շուշին ամբողջովին գտնվում էր Ադրբեջանի հսկողության ներքո: ԲՀԿ-ի ջոկատները ձևավորվել են, մենք հայտարարել ենք, որ ՊՆ-ի և ԳՇ-ի հետ համաձայնեցված մեր ջոկատները գործել են»,-ասաց Տոնոյանը՝ նշելով, որ Փաշինյանն իր սխալները փորձում է ուրիշի կողմ ուղղել:

Ազատության հրապարակում զանգվածային ձերբակալություններ են, բազմաթիվ քաղաքական ու հասարական գործիչների արդեն բերման են ենթարկվել:

Բացի այդ, քաղաք մտնող մեքենաները ստուգում կամ արգելում են մտնել: