Բոլոր ձերբակալվածները պետք է ազատ արձակվեն, դա կապահովի մեր երկրի ներքին անվտանգությունը և հնարավորություն կստեղծի այս բարդ իրավիճակից լուծումներ գտնելու համար. Էլինար Վարդանյան
«Այլընտրանքային նախագծեր խմբի» անդամ Էլինար Վարդանյանը հոդված է հրապարակել, որում անդրադարձել է երեկվանից սկսած ձերբակալություններին։
Նա մասնավորապես նշել է.
Պրոցեսն իրավական չէ։ Փաշինյանի անօրինական հրահանգներին ենթարկվելուց առաջ իրավապահները պետք է գնահատեն իրենց գործողությունները։ Սա նրանց մասնակից է դարձնում հայրենիքը հանձնելու անպատիվ գործին։
«Ուզում եմ դիմել ժողովրդին բռնության ենթարկող ոստիկաններին: Մարդիկ պայքարում են իրենց հայրենիքի համար։ Դուք ում դեմ կամ ինչի համար եք պայքարում։ Դուք չպետք է կաշկանդված լինեք անօրինական հրահանգներով։
Ուզում եմ դիմել իմ գործընկեր փաստաբաններին։ Հարգելի փաստաբաններ, այստեղ այլևս դատավարական պրոցեսներ չեն ընթանում։ Պետք չեն անդեմ հայտարարություններ «ՀՔԾ քննիչ», «ԱԱԾ աշխատակից», «Դատավոր»։ Հասարակությունը պետք է իմանա ում համար է իր «ընտանիք պահելու» արդարացումը ավելի կարևոր, քան երկրի ճակատագիրը։
Հասարակությունը պետք է իմանա ովքեր են իրենց պաշտոնները պահելու համար մասնակից դառնում հակաօրինական պրոցեսներին։ Հասարակությունը պետք է իմանա նրանց անունները։ Հիմա պետք է անվանապես ասել, որ քննիչը, որ դատավորն է անօրինական գործողություններ կատարում՝ Վանեցյանի, Ծառուկյանի, Սաղաթելյանի և մյուսների դեմ։ Եվ այդ մարդիկ պետք է իմանան, որ անհատական պատասխանատվության են ենթարկվելու՝ այս ճակատագրական պահին անօրինականություններ անելու համար։ Հերիք է ամեն ինչ արդարացնել «տուն պահելու» կամ «համակարգի մարդ» լինելու կեղծ արդարացումներով։ Կա՛մ անում ես անարդարություն ու մաս կազմում դավաճանությանը, կա՛մ մնում ես մարդ ու սպա։
Բոլոր ձերբակալվածները պետք է անհապաղ ազատ արձակվեն։ Դա կապահովի մեր երկրի ներքին անվտանգությունը և հնարավորություն կստեղծի այս բարդ իրավիճակից լուծումներ գտնելու համար»։










