«Դա չի քննարկվել». Պեսկովը մեկնաբանել է՝ արդյոք Ռուսաստանը պատրաստ է համաձայնել տարածաշրջանում թուրք խաղաղապահների ներկայությանը
Թուրք խաղաղապահների մասնակցությունը Լեռնային Ղարաբաղում հակամարտության կարգավորմանն անհնար է առանց Երևանի և Բաքվի համաձայնության, սակայն այդ հարցը չի քննարկվել: Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը, գրում է ՏԱՍՍ գործակալությունը:
Պատասխանելով այն հարցին, թե արդյոք Ռուսաստանը պատրաստ է համաձայնել տարածաշրջանում թուրք խաղաղապահների ներկայությանը, Կրեմլի ներկայացուցիչն ասել է, որ «այդ հարցը չի քննարկվել»:
«Դա չի կարող քննարկման թեմա լինել միայն Մոսկվայի և Անկարայի միջև: Դրան պետք է համաձայնություն տան Հայաստանն ու Ադրբեջանը»,-ասել է Պեսկովը՝ հավելելով, որ «նման պայմանավորվածություններ չեն եղել»:
Ավելի վաղ Թուրքիայի արտգործնախարար Մևլութ Չավուշօղլուն հայտնել էր, որ ռուսական պատվիրակությունը պատրաստվում է նոյեմբերի 13-ին Թուրքիա այցելել՝ քննարկելու Լեռնային Ղարաբաղում համատեղ դիտորդական կենտրոն ստեղծելու հարցը:
«Կարևոր ենք համարում Լեռնային Ղարաբաղի հարցով Ռուսաստանի դիրքորշումը: Ուրբաթ ռուսաստանյան պատվիրակությունը կժամանի Թուրքիա՝ քննարկելու Ղարաբաղում համատեղ դիտորդական կենտրոնի ստեղծման մանրամասները»,- նշել է ԱԳ ղեկավարը:
Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն:
Ռուս խաղաղապահների մի մասն արդեն Արցախում է։ Նոյեմբերի 11-ին ՀՀ պաշտպանության նախարար Դավիթ Տոնոյանն ընդունել է Լեռնային Ղարաբաղի հակամարտության գոտում հրադադարի ռեժիմի վերահսկման նպատակով ժամանած ՌԴ խաղաղապահ զորակազմի հրամանատար, գեներալ-լեյտենանտ Ռուստամ Մուրադովին: Հանդիպմանը քննարկվել են խաղաղապահ առաքելության կազմակերպման և իրականացման հարցեր։










