Պուտինն առանցքային դեր է խաղացել ԼՂ հակամարտության կարգավորման գործում. Պեսկով (տեսանյութ)
Ռուսաստանի նախագահ Վլադիմիր Պուտինի դերը Լեռնային Ղարաբաղի հակամարտության լուծման գործում առանցքային էր, կարգավորմանը նախորդել է ինտենսիվ բազմօրյա աշխատանք: Այս մասին RT հեռուստաընկերությանը տված հարցազրույցում հայտարարել է ՌԴ նախագահի մամուլի խոսնակ Դմիտրի Պեսկովը:
«Դերը առանցքային էր: Ստորագրմանը նախորդել է շատ շատ օրերի լարված, երբեմն գրեթե շուրջօրյա աշխատանք: Դա նախագահ Պուտինի աշխատանքն էր»,-ասել է Պեսկովը:
Նրա խոսքով ՝ Ռուսաստանի ղեկավարն «անընդհատ կապի մեջ էր» Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հետ:
«Եվս մեկ անգամ կրկնում եմ, դա մեկ օր չի տևել», - ավելացրել է Պեսկովը:
Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն:
Ռուս խաղաղապահների մի մասն արդեն Արցախում է։ Նոյեմբերի 11-ին ՀՀ պաշտպանության նախարար Դավիթ Տոնոյանն ընդունել է Լեռնային Ղարաբաղի հակամարտության գոտում հրադադարի ռեժիմի վերահսկման նպատակով ժամանած ՌԴ խաղաղապահ զորակազմի հրամանատար, գեներալ-լեյտենանտ Ռուստամ Մուրադովին: Հանդիպմանը քննարկվել են խաղաղապահ առաքելության կազմակերպման և իրականացման հարցեր։










