Սիրիական Համայում ԻՊ գրոհայինները հարձակվել են կառավարական զորքերի վրա. կողմերն ունեն տասնյակ զոհեր. լրատվամիջոցներ

16:50 • 13.11.20

Սիրիական Համա նահանգի արևելյան հատվածում «Իսլամական պետության» գրոհայինները լայնամաշտաբ հարձակման են ենթարկել Սիրիայի կառավարական զորքերը, ինչի հետևանքով կողմերը լուրջ մարդկային կորուստներ են կրել։

Այս մասին, ինչպես գրում է EaDaily-ն, հաղորդում է Մարդու իրավունքների մշտադիտարկման սիրիական կենտրոնը (SOHR)՝ հղում անելով Սիրիայում ունեցած աղբյուրներին։

Սալամիա քաղաքից արևելք ընկած Աբու-Ֆայադ ամբարտակի շրջանում զինյալ գրոհայինների հարձակման հետևանքով զոհվել է 21 սիրիացի զինվոր, սակայն ենթադրվում է, որ զոհերի թիվը դեռ կավելանա, քանի որ անսպասելի հարձակման հետևանքով կան բազմաթիվ վիրավորներ, որոնց վիճակը գնահատվում է ծանր։

Al-Masdar News գործակալության տվյալներով՝ ԻՊ-ի ահաբեկիչները գրոհել են կառավարական ուժերի դիրքերը՝ հասնելով Համա և Հոմս նահանգների վարչական սահման։ Սիրիական բանակին հաջողվել է ամբողջությամբ հետ մղել հարձակումը հինգշաբթի երեկոյան։ Ահաբեկիչները նահանջել են՝ կրելով կենդանի ուժի զգալի կորուստներ։

Հաղորդվում է, որ հարձակման հետևանքով սպանվել է ավելի քան 40 զինյալ։ Անհաջող հարձակումից հետո ահաբեկիչները նահանջել են՝ փախչելով դեպի Բադիյա ալ-Շամի անապատային տարածքները։