Ռուս ուղղափառ եկեղեցին հույս է հայտնել, որ Մոսկվայի պատրիարքի միջնորդությամբ Հայաստանի և Ադրբեջանի կրոնական առաջնորդների միջև կվերսկսվեն բանակցությունները
Մոսկվայի Պատրիարքարանի Արտաքին հարաբերությունների բաժնի նախագահ Վոլոկոլամսկի միտրոպոլիտ Իլարիոնը հայտարարել է, որ ռուս ուղղափառ եկեղեցին հուսով է՝ Մոսկվայի և Համայն Ռուսիո պատրիարք Կիրիլի միջնորդությամբ Հայաստանի և Ադրբեջանի կրոնական առաջնորդների միջև կվերսկսվեն բանակցությունները, գրում է ՏԱՍՍ գործակալությունը։
«Գոյություն է ունեցել և գոյություն ունի եռակողմ բանակցությունների մեխանիզմ, որի շրջանակում հայոց պատրիարքը, Կովկասի մահմեդականների հոգևոր վարչության ղեկավարը և Մոսկվայի և Համայն Ռուսիո պատրիարքը հանդիպում են, քննարկում են առկա խնդիրները և համապատասխան որոշումներ կայացնում»,- ասել է նա։
Վոլոկոլամսկի միտրոպոլիտի կարծիքով՝ ժամանակն է վերադառնալ այդ ձևաչափին։
«Ես հուսով եմ, որ մոտ ապագայում Մոսկվայի պատրիարքի միջնորդությամբ Հայաստանի և Ադրբեջանի կրոնական առաջնորդների միջև կվերսկսվեն բանակցությունները և այդ ժամանակ հնարավոր կլինի լուծել երկու երկրների տարածքում կրոնական կառույցների վերականգնման և բնականոն գործունեության հետ կապված հարցերը»,- նշել է նա։
Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն:
Ռուս խաղաղապահների մի մասն արդեն Արցախում է։ Նոյեմբերի 11-ին ՀՀ պաշտպանության նախարար Դավիթ Տոնոյանն ընդունել է Լեռնային Ղարաբաղի հակամարտության գոտում հրադադարի ռեժիմի վերահսկման նպատակով ժամանած ՌԴ խաղաղապահ զորակազմի հրամանատար, գեներալ-լեյտենանտ Ռուստամ Մուրադովին: Հանդիպմանը քննարկվել են խաղաղապահ առաքելության կազմակերպման և իրականացման հարցեր։
Ավելի վաղ Ռուսաստանի պաշտպանության նախարար Սերգեյ Շոյգուն հայտնել էր, որ ռազմական տրանսպորտային ավիացիան 3 օրվա ընթացքում Լեռնային Ղարաբաղ է տեղափոխել 1103 զինծառայող և 168 միավոր տեխնիկա:










