Լավրովն ու Մնացականյանը քննարկել են Ղարաբաղում ռուս խաղաղապահների տեղակայմանն առնչվող հարցեր

18:55 • 15.11.20

Նոյեմբերի 15-ին հեռախոսազրույց է կայացել ՌԴ ԱԳ նախարար Սերգեյ Լավրովի և Հայաստանի ԱԳ նախարար Զոհրաբ Մնացականյանի հետ: Այս մասին հայտնում է ՌԴ ԱԳՆ-ն:

«Նախարարները քննարկել են Ռուսաստանի, Հայաստանի և Ադրբեջանի ղեկավարների՝ նոյեմբերի 9-ի համատեղ հայտարարության իրագործման ընթացքը, այդ թվում՝ ղարաբաղյան հակամարտության գոտում ռուս խաղաղապահների տեղակայման և նրանց կողմից մանդատի արդյունավետ կատարման ապահովման հետ կապված հարցերը»- ասվում է ԱԳՆ հաղորդագրության մեջ:

Ինչպես նշվում է, Լավրովը Մնացականյանին տեղեկացրել է ՌԴ նախագահի՝ նոյեմբերի 13-ի հրամանագրով ստեղծված հումանիտար հարցերով արձագանքման միջգերատեսչական կենտրոնի գործունեության ծրագրերի մասին:

«Արտաքին քաղաքականության գերատեսչությունների ղեկավարներն ընդգծել են ՄԱԿ-ի փախստականների հարցերով գերագույն հանձնակատարի գրասենյակի, ՅՈւՆԵՍԿՕ-ի, ՄԱԿ-ի Զարգացման ծրագրի, Կարմիր խաչի միջազգային կոմիտեի և այլ բազմակողմանի կազմակերպությունների հետ համագործակցություն հաստատելու կարևորությունը՝ ի շահ հակամարտության գոտում քաղաքացիական անձանց դրության թեթևացման և կրոնական ու մշակութային կառույցների պահպանման»,- հավելել են գերատեսչությունից:

Հիշեցնենք, որ Նիկոլ Փաշինյանը նոյեմբերի 9-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։ Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: ՌԴ խաղաղապահների մի մասին արդեն տեղակայվել է Արցախում։