Տարբեր խմբերի կազմակերպված, թիրախավորված բռնության կոչերը և սպառնալիքները նպաստում են երկրի ներքին վիճակի լարմանը, ինչը վտանգավոր է, քանի որ կարող է հանգեցնել բռնության․ Արման Թաթոյան
Ես երեկ հայտարարություն տարածեցի երկրում ատելության խոսքի հետ կապված, որովհետև շատ մտահոգիչ է վիճակը: Հատկապես անթույլատրելի է այն, որ մեծ ծավալով հայտնվեցին ատելության խոսք ու բռնություն տարածող ագրեսիվ, կեղծ օգտահաշիվներ, ցավոք սրտի, հավանաբար, այդ սադրանքներին տրվելով մասնակցում են իրական օգտատերեր. «Արմնյուզ» հեռուստաընկերության ուղիղ եթերի ժամանակ ասել է մարդու իրավունքների պաշտպան Արման Թաթոյանը:
«Տարբեր խմբերի կազմակերպված, թիրախավորված բռնության կոչերը և սպառնալիքները նպաստում են երկրի ներքին վիճակի լարմանը և դա վտանգավոր է այն առումով, որ կարող է հանգեցնել բռնության: Ուզում եմ նաև արձանագրել, որ այդ կեղծ օգտահաշիվները նպատակ ունեն քննարկման ներքաշել իրական օգտահաշիվներին, որն ավելի է լարում մթնոլորտը: Խոսքի ազատության երաշխիքներով ատելության խոսքը չի պաշտպանվում, դա արգելված է, դա ավելի է լարում սրում մթնոլորտը, որտեղ անելիք ունենք բոլորս»- նշեց նա:
Դիտարկմանը թե վարչապետն այսօր իր ելույթում անդրադարձավ Ձեզ, որ չեք դատապարտել նոյեմբերի 9-ի լույս 10-ի գիշերը տեղի ունեցած դեպքերը, բայց, իրականում, Դուք դատապարտել եք, Արման Թաթոյանը պատասխանեց, որ ինքը դատապարտել է նոյեմբերի այդ դեպքերը.«Խիստ դատապարտելի է Ազգային ժողովի նախագահի Արարատ Միրզոյանի նկատմամբ գործադրված բռնությունը հատկապես երեխայի ներկայությամբ: Խոսել եմ առողջապահական մարմինների հետ Արարատ Միրզոյանի առողջական վիճակի հետ կապված և դատապարտել եմ նաև լրագրողների նկատմամբ բռնությունը»:
Արման Թաթոյանի խոսքով՝ հաճախ շահարկվում է, թե ինչո՞ւ ՄԻՊ-ը չի դատապարտում կոնկրետ քաղաքացիների, երբ նրանք գրառում են անում, նշելով, որ ՄԻՊ-ի ուղիղ ազդեցությունը չի տարածվում քաղաքացու վրա: Նրա խոսքով՝ եթե պետական որևէ մարմին կատարում է խախտում, իրենք անմիջապես դիմում են և պահանջում ենք պարզաբանումներ և հարկ եղած դեպքում այդ մարմնին պատասխանատվության կանչելու միջնորդություն են ներկայացնում։
«Եկեք պատկերացնենք մի իրավիճակ, որ ՄԻՊ-ը քննադատության է արժանացնում, ինչ -որ մի քաղաքացու, և իրավապահ մարմինները պարտավոր են արձագանքել և նրան կալանավորում են և կարող է այդ մարդը դժգոհ լինի իրավապահ մարմիններից և դիմի ՄԻՊ-ին, հիմա ինչպե՞ս է լինելու, ես այդ մարդկանց ո՞նց եմ պաշտպանելու: Սահմանադրության մեջ ուղիղ գրված է, սա դատապարտելի մոտեցում է, որը տարվում է՝ սկսած Խորհրդարանից: ՄԻՊ-ը չի կարող քաղաքացիների նկատմամբ հարկադրանքի միջոցներ կիրառել, հակառակը՝ ՄԻՊ ազգային հաստատությունը նրա համար է, որ հետևի մարմինների կողմից քաղաքացիների իրավունքների պաշտպանությունը: Չկա իրավական գիտելիք, թե ինչ իրավասություն ունի մարդու իրավունքների պաշտպանը և ակնհայտ է, որ հատկապես պաշտոնատար անձինք պարտավոր են իմանալ ՄԻՊ-ի իրավական կարգավիճակը»,– ասաց նա:
Արման Թաթոյանն անդրադառնալով Նիկոլ Փաշինյանի ֆեյսբուքյան գրառմանը, որով կոչ էր անում, վերջնականապես լուծել «պատերի տակ վնգստացողների» հարցերը, նշեց, որ երեկ անհապաղ արձագանքել է․ դա ուներ կանխարգելիչ բնույթ և ուղղված էր ողջ հանրությանը:
«Վերջին օրերին տարածվում էին տեսանյութեր, որտեղ զինվորական համազգեստով զինված անձանց կողմից բռնության կոչեր էին հնչում, և հատկապես բարձրաստիճան պաշտոնյաներ տարածում էին այդ հայհոյանքով լի տեսանյութերը: Հանրապետության Հրապարակում բռնության սպանության սպառնալիք պարունակող արտահայտություններով տեսանյութի ցուցադրումը, ինչպե՞ս կարելի է նման բան անել, դա դիտվում է պետության կողմից խրախուսվող քայլ»,- ընդգծեց Թաթոյանը:










