«Իմ քայլի» պատգամավորները չեն ցանկանո՞ւմ քննարկել այն հարցը, որ Մեղրիի ճանապարհը էստակադայի նման է լինելու, և այնտեղ լինելու են Թուրքիայի ու Ադրբեջանի դրոշները. Էդմոն Մարուքյան
ԱԺ արտահերթ նիստին «Լուսավոր Հայաստան» խմբակցության պատգամավոր Էդմոն Մարուքյանն ԱԺ նիստը վարող փոխխոսնակ Լենա Նազարյանին ասաց, որ իրենք նախաձեռնել էին ստորագրված հայտարարությունը քննարկելու և դրա իրավաչափության հարցով արտահերթ նիստ գումարելու հարց, և հավելեց՝ չեք կարծո՞ւմ, որ ստեղծված իրավիճակում լավ կլիներ, որ նիստ գումարեինք և ստորագրված հայտարարությունը քննարկեինք:
Լենա Նազարյանն էլ արձագանքեց, թե եղել է խորհրդի նիստ, ինքը վարել է այդ նիստը, և քվորում չի եղել, հետևապես այն պատգամավորները, որ ներկա չեն եղել, հարկ չեն համարել այդ հարցը քննարկել:
««Իմ քայլը» էն ժամանակ չի եկել, հիմա եկել են, հիմա կարո՞ղ ենք այդ հարցը քննարկել: Եթե ոչ, Ձեր ասածից դուրս է գալիս, տիկին Նազարյան, որ ձեր պատգամավորները հարկ չեն համարում քննարկել, օրինակ, Մեղրիի վրայով անցնող ճանապարհի հարցը: Օրինակ՝ ասում են՝ այդ ճանապարհը էստակադայի նման է լինելու, և դրա վրա լինելու են Ադրբեջանի և Թուրքիայի դրոշներ, և մեքենաները գնալու են, գալու են, մեր քաղաքացիներն էլ այդտեղով քայլելու են ու նայեն Թուրքիայի ու Ադրբեջանի դրոշներին և այդ անցնող մեքենաներին: Մի հատ էդ հարցը հասկանայինք, էդ ճանապարհը ե՞րբ է կառուցվելու, ինչո՞ւ է այդ ճանապարհը տրվել: Քննարկեինք, որ այս օրերին մարդկանց գերի են վերցնում և խախտում են հայտարարությունը, արդյո՞ք դա հիմք է տալիս Քարվաճառից դուրս չգալու համար: Նման հարցեր կան, ուզում եք ասել՝ մեր 88 գործընկերները չե՞ն ուզում այս հարցերը քննարկել»,- հակադարձեց Էդմոն Մարուքյանը:
Լենա Նազարյանն էլ շեշտեց, թե բոլորովին նման բան չի ուզում, և որ այդ հարցերն իրենք քննարկում էին, երեկ էլ էին քննարկում, իսկ նրանք բացակա էին: «Ձեր առաջարկած նախագծից պարզ չէր, թե ինչ պետք է քննարկեինք, և այն, որ «Իմ քայլը» խմբակցության պատգամավորները բացակա էին, ո՛չ անգործություն է, ո՛չ պատահականություն, դա դիրքորոշում է, որովհետև պարզ չէր, թե ինչ էիք ուզում քննարկել, հիմա պարզ է»,- ասաց ԱԺ փոխխոսնակը:










