«Դա երկրի ներքին գործն է». Պուտինը մեկնաբանել է Հայաստանում ներքաղաքական իրավիճակը

10:15 • 18.11.20

Ռուսաստանի Դաշնության նախագահ Վլադիմիր Պուտինը, անդրադառնալով Լեռնային Ղարաբաղի շուրջ ձեռք բերված եռակողմ պայմանավորվածությունների ֆոնին Հայաստանում ստեղծված իրավիճակին, հայտարարել է, որ դա «երկրին ներքին գործն է»:

«ՌԻԱ Նովոստի» գործակալությունը հիշեցնում է՝ Երևանում արդեն մի քանի օր է, ինչ ԼՂ-ում կրակի դադարեցման մասին փաստաթղթի ստորագրումից հետո պահանջում են վարչապետ Նիկոլ Փաշինյանի հրաժարականը:

«Ինչ վերաբերում է ներքաղաքական իրավիճակին, ապա դա մեր գործը չէ, դա Հայաստանի գործն է: Դա անկախ, ինքնիշխան պետություն է: Այդ պետությունն իրավասու է իր ներքին հարցերը լուծել այնպես, ինչպես ճիշտ է համարում»,-ասել է Պուտինը «Ռոսիա 24» հեռուստաալիքի եթերում:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն:

Ռուս խաղաղապահների մի մասն արդեն Արցախում է։ Նոյեմբերի 11-ին ՀՀ պաշտպանության նախարար Դավիթ Տոնոյանն ընդունել է Լեռնային Ղարաբաղի հակամարտության գոտում հրադադարի ռեժիմի վերահսկման նպատակով ժամանած ՌԴ խաղաղապահ զորակազմի հրամանատար, գեներալ-լեյտենանտ Ռուստամ Մուրադովին: Հանդիպմանը քննարկվել են խաղաղապահ առաքելության կազմակերպման և իրականացման հարցեր: