ԼՂ հակամարտության գոտում ռուս խաղաղապահների տեղակայման շրջանակում նոյեմբերի 10-ից իրականացվել է ավելի քան 170 չվերթ. ՌԴ ՊՆ

10:37 • 18.11.20

Ռուսաստանի ռազմատրանսպորտային ավիացիայի Իլ-76 և Ան-124 «Ռուսլան» ինքնաթիռները շարունակում են ռուսական խաղաղապահ կոնտինգենտի անձնակազմի, ռազմական տեխնիկայի և նյութական միջոցների տեղափոխումը Լեռնային Ղարաբաղի հակամարտության գոտի:

 «Արմենպրես»-ի փոխանցմամբ՝ ինչպես հաղորդում է ՌԴ պաշտպանության նախարարությունը, նոյեմբերի 10-ից սկսած իրականացվել է ավելի քան 170 չվերթ:

Նշվում է, որ ՌԴ զինված ուժերի 15-րդ խաղաղապահ բրիգադի անձնակազմին ԼՂ հակամարտության գոտի տեղափոխելու համար հերթական Իլ-76 և Ան-124 ինքնաթիռները իրականացրել են նյութական միջոցների, սպառազինության և ռազմական տեխնիկայի բեռնում ու թռիչք իրականացրել դեպի Երևան:

Ռուսաստանի պաշտպանության նախարարությունը շարունակում է ռուս խաղաղապահների տեղափոխումը ԼՂ հակամարտության գոտում առաջադրանքների կատարման վայր:  

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն:

Ռուս խաղաղապահների մի մասն արդեն Արցախում է։ Նոյեմբերի 11-ին ՀՀ պաշտպանության նախարար Դավիթ Տոնոյանն ընդունել է Լեռնային Ղարաբաղի հակամարտության գոտում հրադադարի ռեժիմի վերահսկման նպատակով ժամանած ՌԴ խաղաղապահ զորակազմի հրամանատար, գեներալ-լեյտենանտ Ռուստամ Մուրադովին: Հանդիպմանը քննարկվել են խաղաղապահ առաքելության կազմակերպման և իրականացման հարցեր: