Հունաստանի կողմից F 35-երի ձեռբերմանը Թուրքիան կարող է պատասխանել ռուսական Սու 35 կամ Սու 57 կործանիչների գնմամբ. The Military Watch Magazine

17:40 • 20.11.20

Միջերկրական ծովի արևելյան հատվածում Հունաստանի հետ շարունակվող տարածքային վեճերի պատճառով Թուրքիայի վրա գործադրվող ճնշման ֆոնին Հունաստանի պաշտպանության նախարարությունը հայտարարել է ԱՄՆ-ից F 35A «անտեսանելի» կործանիչների գնման անհրաժեշտության մասին, գրում է The Military Watch Magazine-ը՝ նշելով, թե ինչպիսին կարող է լինել Անկարայի պատասխանն Աթենքի նման քայլին։

Ինչպես հաղորդում է պարբերականը, Թուրքիան բանակցություններ էր վարում ռուսական Սու 35 կործանիչների գնման համար և մեծ հետաքրքրություն է ցուցաբերում նաև էլ ավելի կատարելագործված Սու 57 կործանիչների նկատմամբ, սակայն ռազմական այս ինքնաթիռների գնման պատվերներ Ռուսաստանը դեռ չի ստացել, ուստի Թուրքիայի՝ F 35-ին դիմակայելու կարողությունները շարունակում են մնալ սահմանափակ։

Պաշտոնաթող թուրք գեներալ-մայոր Նեջաթ Էսլանը հայտարարել է, որ հունական F 35 ինքնաթիռների դեմն առնելու համար այս պահին Թուրքիան կարող է հույսը դնել միայն վերջերս մատակարարված ռուսական С 400 ՀՕՊ համակարգերի վրա, քանի որ դրանց համար F 35-ի «անտեսանելիությունը» խնդիր չի հանդիսանա։

Ավելի վաղ Թուրքիան ոչ միայն աշխարհում F 35A-ի խոշորագույն պատվիրատուն էր, այլև կործանիչների արտադրության ծրագրի մասնակիցը, սակայն ռուսական հակահրթիռային համակարգերի գնումից հետո Թուրքիայի բացառումն այս ծրագրից բավական անորոշ դրության մեջ դրեց Անկարային։ Միևնույն ժամանակ թուրքական TF-X հինգերորդ սերնդի կործանիչների նախագիծն առայժմ ևս անորոշ հեռանկարներ ունի։

Չնայած, որ С 400-ը ստեղծվել է ժամանակակից «անտեսանելի» կործանիչների չեզոքացման համար, ցամաքային ՀՕՊ համակարգերի գործածությունը հունական օդուժի դեմ պայքարում կարող է միայն թուրքական զինուժի ինքնապաշտպանությունն ապահովել։ Իրավիճակը հնարավոր կլինի շտկել ռուսական կործանիչների ձեռքբերմամբ, որոնք հիանալի համալրում կլինեն С 400 ՀՕՊ համակարգերին։

Ինչպես գրում է պարբերականը, բացառված չէ, որ Անկարան Հունաստանում F 35 կործանիչների տեղակայմանը պատասխանի ռուսական Սու 35 կամ անգամ Սու 57 ինքնաթիռների գնմամբ, սակայն քանի որ ԱՄՆ-ը փորձում է խանգարել ռուս-թուրքական պաշտպանական կապերի զարգացմանը, մեծ է հավանականությունը, որ Թուրքիայի նման գործողությունները կարող են արդյունավետ զսպող գործոն դառնալ Հունաստանին հինգերորդ սերնդի ռազմական ինքնաթիռների վաճառքի դեմ։