ՌԴ ԱԻՆ-ի անձնակազմը Լեռնային Ղարաբաղում կհամալրվի հոգեբաններով

19:41 • 20.11.20

Ռուսաստանի ԱԻՆ-ը մտադիր է մեծացնել իր անձնակազմը Լեռնային Ղարաբաղում: ТАСС գործակալության փոխանցմամբ՝ այս մասին ասել է ՌԴ ԱԻՆ-ի միջազգային գործունեության հարցերով վարչության ղեկավար Վլադիմիր Սոլովյովը:

«ՌԴ ԱԻՆ-ի անձնակազմի համալրում տեղի կունենա Լեռնային Ղարաբաղում: Նախատեսվում է հոգեբանների ուղարկել, նրանք կաշխատեն տեղում»,- ասել է Սոլովյովը:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: ՌԴ խաղաղապահների մի մասին արդեն տեղակայվել է Արցախում։