ՄԱԿ-ում հայտարարել են Իդլիբում տեղի ունեցող ռազմական հանցագործությունների մասին

17:03 • 20.11.20

ՄԱԿ-ի Մարդու իրավունքների հարցերով գերագույն հանձնակատարի գրասենյակի պաշտոնական ներկայացուցիչ Ռավինա Շամդասանին հայտարարել է, որ սիրիական Իդլիբում զինյալները շարունակում են իրականացնել զինվորական հանցագործություններ, խաղաղ բնակիչների և մարդասիրական ոլորտի աշխատակիցների մահապատիժներ են իրագործում, գրում է «ՌԻԱ Նովոստի» գործակալությունը: 

«Մտահոգիչ հաղորդագրություններ ենք ստանում Սիրիայի հյուսիսարևմտան Իդլիբում «Հայաթ Թահրիր աշ-Շամի»-ի և այլ զինված խմբավորումների վերահսկողության տակ գտնվող շրջաններում քաղաքացիական անձանց, այդ թվում՝ մարդասիրական ոլորտի աշխատակիցների ձերբակալությունների մասին: Նաև խորը մտահոգությունների առիթ տվող հաղորդագրություններ ենք ստանում ձերբակալություններից և այսպես կոչված «դատական ընթացակարգերից» հետո փաստացի իշխանությունների կողմից իրականացվող մահապատիժների մասին»,- նշել է նա: 

Տեղեկությունների համաձայն՝ չորեքշաբի «Հայաթ Թահրիր աշ-Շամ» խմբի զինյալները հաստատել են, որ «բարոյական» և «քրեական» հանցագործությունների մեղադրանքներով իրենց մոտ են պահում 28-ամյա լրագրող  Նուր աշ-Շալոյին: Նշվում է, որ կինը դեռևս սեպտեմբերին է ձերբակալվել: ՄԱԿ-ի Մարդու իրավունքների հարցերով գերագույն հանձնակատարի գրասենյակի համաձայն՝ Նուր աշ-Շալոյին կարող է մահապատիժ սպառնալ: 

Շամադասանի խոսքով՝ կառույցը նաև տեղեկություն ունի այն մասին, որ «Հայաթ Թահրիր աշ-Շամ» զինյալ խմբավորումն արդեն մահապատժի դատապարտել է մի քանի մարդու՝ հակամարտող կողմին, այդ թվում՝ քրդական զինված խմբավորումներին և սիրիական կառավարությանը ենթադրյալ պատկանելիության կամ աստվածանարգության, ամուսնական անհավատարմության, գողության կամ սպանության համար: 

Շամադասանին ընդգծել է, որ միջազգային մարդասիրական իրավունքը ուղղակիորեն արգելում է առանց նախնական դատական որոշման պատժաչափերի և մահապատժի սահմանումը: