ՌԴ դեսպանը թուրքական կողմին քննադատել է COVID-19-ի դեմ ռուսական պատվաստանյութը թերագնահատելու համար

11:14 • 18.01.21

Թուրքիայում Ռուսաստանի դեսպան Ալեքսեյ Երխովը քննադատել է թուրքական բժշկական ասոցիացիայի (TTB) ղեկավարին` COVID-19-ի դեմ պատվաստանյութերը գնահատող հոդվածում ռուսական «Սպուտնիկ V»-ին չանդրադառնալու համար, հաղորդում է ռուսական Sputnik Turkiye լրատվական գործակալությունը:

Թուրքական բժշկական ասոցիացիայի նախագահին ուղղված նամակում Ռուսաստանի դեսպանը վերջինիս քննադատել է «Պատվաստանյութերը՝ բոլոր կենդանի էակների համընդհանուր արժեքը» վետառությամբ հոդվածի համար, որում մանրամասն նկարագրված է COVID-19-ի բոլոր պատվաստանյութերի արդյունավետությունը՝ բացառությամբ ռուսականի։

«Մեր աշխարհը բախվել է աննախադեպ մարտահրավերի, որը կարելի էր հաղթահարել՝ մոբիլիզացնելով  համաշխարհային հանրության ջանքերը, ներառյալ՝ անվտանգ և արդյունավետ պատվաստանյութերի մշակման հարցում, որոնք կփրկեն միլիոնավոր կյանքեր և կկանգնեցնեն կորոնավիրուսային վարակների նոր տեսակների տարածումը։ Այն փաստը, որ Գամալեայի կենտրոնի կողմից մշակված Gam-Covid-Vac պատվաստանյութը, որն աշխարհում առաջին ազգային գրանցված պատվաստանյութն է, բացակայել է Ձեր հոդվածում, ակնհայտորեն անակնկալ էր մեզ համար»,- ասված է Թուրքիայում ՌԴ դեսպանի նամակում։

Երխովն իր նամակում նաև ընդգծել է, որ ռուսական պատվաստանյութն արտահանվել է 9 երկիր։

«Քաղաքական իրադրությունը և առևտրային չափանիշները չպետք է վեր դասվեն քաղաքացիների առողջության շահերի պաշտպանությունից»,- գրել է Երխովը։

Թուրքիայի և Ռուսաստանի միջև ռուսական պատվաստանյութերի ձեռբերման շուրջ մի շարք քննարկումներ են տեղի ունեցել։ Այնուամենայնիվ, թուրքական կողմը դրանք ձեռք բերելու հարցում հետաքրքրություն չի ցուցաբերել։