Գիտնականները պարզել են արկտիկական սառույցների հալչելու կարևոր պատճառներից մեկը

CLOUD միջազգային կլիմայական նախագծի գիտնականները պարզել են, որ արկտիկական սառույցների արագ հալչելու պատճառներից մեկը Հյուսիսային սառուցյալ օվկիանոսի վրա յոդ պարունակող ամպերի առաջացումն է: 

Այս մասին գրում է «ՌԻԱ Նովոստի»-ն, նշելով՝ դրանց գոյացման պատճառը ծովի ջրից անջատված յոդի մասնիկներ են:

Նշվում է՝ այս «բաղադրությամբ» ամպերը, որոնք սահում են Արկտիկայի և Անտարկտիդայի վրայով,  նպաստում են այդ շրջանների տաքացման գործընթացին՝ այդպիսով արգելափակելով Երկրի մակերևույթից ալիքային ջերմության հեռացումը:

Գիտնականները մանրամասնում են՝ Երկրի մթնոլորտում բոլոր ամպերը ձևավորվում են աէրոզոլներից (օդային միջավայրում գտնվող հեղուկ մասնիկներից բաղկացած դիսպերսիոն համակարգ,-խմբ.), որոնք առաջանում են, երբ ջրի գոլորշին միաձուլվում է օդային մասնիկների հետ:

«Ամպերի ձևավորման համար որոշիչ նշանակություն ունի այն, թե ինչից են բաղկացած աէրոզոլի մասնիկները՝ փոշուց, աղի բյուրեղներից, բույսերի կողմից թողարկված մոլեկուլներից, թե՞ մարդկային գործունեության հետևանքով անջատված նյութերից, ինչպիսին է, օրինակ, մուրը»,- բացարտրում են նրանք:

Հիշեցնենք՝ 21 հետազոտական ընկերություն ընդգրկող CLOUD համընկերության հետազոտողոները ուսումնասիրում են, թե ինչպես են աէրոզոլի նոր մասնիկները առաջանում գազերից և շարունակում շատանալ մթնոլորտում:

Գիտնականների հետազոտությունները պարզել են, որ ի թիվս ծծմբային միացությունների և աղի բյուրեղների՝ յոդի միացությունները կարևոր դեր են խաղում մթնոլորտային աէրոզոլների ձևավորման գործում: