ԱՄՆ-ն հետաձգել է Johnson & Johnson պատվաստանյութի հետագա օգտագործման վերաբերյալ որոշման ընդունումը, որպեսզի ուսումնասիրի թրոմբի առաջացման դեպքերը

ԱՄՆ Հիվանդությունների վերահսկման և կանխարգելման կենտրոնի փորձագետները նախօրեին կայացած հանդիպմանը հետաձգել են Johnson & Johnson ընկերության պատվաստանյութի հետագա օգտագործման վերաբերյալ որոշման ընդունումը, հաղորդում է CNBS հեռուստաընկերությունը՝ հիշեցնելով, որ երկրում Johnson & Johnson-ով պատվաստումներն ապրիլի 13-ից դադարեցված են։

Փորձագետները հայտարարել են, որ Johnson & Johnson պատվաստանյութի և արյան թրոմբի միջև հնարավոր կապի մասին տեղեկատվությունը բավարար չէ և նախքան վերջնական որոշումը կայացնելը՝ ևս 1 շաբաթ կուսումնասիրեն արձանագրված դեպքերը։

Նշում է, որ փորձագետների խումբը դիտարկել է նաև պատվաստանյութը ոչ բոլոր տարիքային խմբերին թույլատրելու հնարավորությունը։

Ավելի վաղ հաղորդվել էր, որ Միացյալ Նահանգները արյան թրոմբի առաջացման 6 դեպքի ֆոնին դադարեցրել է կորոնավիրուսի դեմ ամերիկյան Johnson & Johnson ապրանքանիշի պատվաստանյութի կիրառումը։

Սննդի և դեղերի վարչությունը տեղեկացրել է, որ թրոմբի առաջացման 6 դեպք է գրանցվել 6,8 միլիոն չափաբաժին պատվաստանյութի կիրառման սահմանում: Վարչությունը խորհուրդ է տվել դադարեցնել պատվաստանյութի օգտագործումը՝ անվտանգության նկատառումներից ելնելով։

Բոլոր 6 դեպքերը գրանցվել են 18-ից 48 տարեկան կանանց մոտ, իսկ ախտանշանները հայտնվել են պատվաստումից 13 օր անց։

Հիշեցնենք՝ Եվրոպական դեղերի գործակալությունը (EMA) հայտարարել էր, որ կվերանայի Johnson & Johnson ընկերության մշակած հակակորոնավիրուսային պատվաստանյութի հավանական ծանր կողմնակի ազդեցությունների մասին տեղեկատվությունը, նախքան դեղամիջոցի՝ Եվրամիությունում լայնամասշտաբ կիրառումը:

Johnson & Johnson-ը ամերիկյան ընկերություն է, սակայն պատվաստանյութը հիմնականում մշակվել է ընկերության Բելգիայում գտնվող դեղագործական մասնաճյուղի կողմից և հայտնի է նաև որպես Janssen: Ի տարբերություն այլ պատվաստանյութերի` այն ներարկվում է մեկ անգամով և կարող է պահվել սառնարանի սովորական ջերմաստիճանում՝ դյուրացնելով դրա տարածումը ավելի տաք և հեռու տարածաշրջաններում։