Կրեմլը մեկնաբանել է ՌԴ հերոս Դելիմխանովի՝ Ուկրաինայում պատերազմի վերաբերյալ հայտարարությունը
Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Ուկրաինայում ռազմական գործողությունը կավարտվի այն բանից հետո, երբ կատարվեն Ռուսաստանի Դաշնության ղեկավարի առաջադրած խնդիրները։
«Նախագահ Պուտինը նախանշել է հատուկ ռազմական գործողության առջև ծառացած խնդիրները։ Այս խնդիրների կատարումը կնշանակի հատուկ ռազմական գործողության ավարտ»,- ասել է Կրեմլի ներկայացուցիչը։
Պեսկովն այսպես է մեկնաբանել Պետդումայի պատգամավոր, ՌԴ հերոս Ադամ Դելիմխանովի խոսքերն Ուկրաինայում ռազմական գործողությունների ավարտի ժամկետների մասին։ Ավելի վաղ Դելիմխանովը, որը մասնակցել է Ռուսաստանի հատուկ ռազմական գործողությանն Ուկրաինայում և Դոնբասում, հույս էր հայտնել, որ գործողությունը կավարտվի 2022 թվականի վերջին։ Միաժամանակ նա ընդգծել էր, որ դեռ վաղ է խոսել հատուկ գործողության ավարտի մասին, գրում է gazeta.ru-ն։
Հիշեցնենք, որ Պետդումայի պատգամավոր, Չեչնիայի նախագահ Ռամզան Կադիրովի խորհրդական Ադամ Դելիմխանովին ապրիլին շնորհվել է Ռուսաստանի հերոսի կոչում: Համապատասխան հրամանագիրը ստորագրել է ՌԴ նախագահ Վլադիմիր Պուտինը։
Դելիմխանովն այս կոչմանն արժանացել է Դոնեցկի ու Լուգանսկի հանրապետություններում, ինչպես նաև Ուկրաինայի տարածքում իրականացված հատուկ գործողության ընթացքում ցուցաբերած հերոսության համար։










