Ուկրաինան պնդում է, որ գերեվարել է ՌԴ բանակում կռվող Չինաստանի քաղաքացիների. Զելենսկին միջազգային հանրությունից պահանջել է արձագանքել

Ուկրաինայի նախագահ Վլադիմիր Զելենսկին հրապարակել է տեսանյութ՝ նշելով, որ Չինաստանի քաղաքացիները, որոնք կռվում էին ռուսական բանակի շարքերում, գերեվարվել են Դոնեցկում:

«Ռուսաստանի կողմից Չինաստանի ուղղակիորեն կամ անուղղակիորեն ներգրավվածությունը Եվրոպայում այս պատերազմին հստակ ազդանշան է, որ Պուտինը պատրաստվում է անել ամեն ինչ պատերազմը դադարեցնելուց բացի: Նա փնտրում է պայքարը շարունակելու ուղիներ: Սրան միանշանակ պետք է արձագանքեն ԱՄՆ-ն, Եվրոպան և աշխարհում բոլորը, ովքեր ցանկանում են, որ խաղաղություն լինի»,- ասել է նա։

Ըստ Զելենսկու՝ տեղեկություններ կան, որ ռուսական ստորաբաժանումներում իրականում կա 2-ից ավելի Չինաստանի քաղաքացի:

«Մենք այս պահին ճշտում ենք բոլոր փաստերը: Հետախուզությունը, Անվտանգության խորհուրդը և զինված ուժերի համապատասխան ստորաբաժանումները աշխատում են այս ուղղությամբ», - ընդգծել է Զելենսկին:

Տեսանյութը կարող եք դիտել Tert.am-ի թելեգրամյան ալիքում: