Լեհաստանում հակակառավարական ցույցեր են. 3 ցուցարար ձերբակալվել է

Հարյուրավոր մարդիկ դուրս են եկել փողոց Լեհաստանում։ Հակակառավարական կարգախոսներով բողոքի դուրս եկած ցուցարարները գիշերը հավաքվել էին Լեհաստանի Գերագույն դատարանի շենքի մոտ՝ դատապարտելու դատարանի նախագահի լիազորությունների ժամանակավորապես կասեցումը, որի համար նրանք մեղադրում են երկրի եվրոպամետ կառավարությանը:

CNN-ի փոխանցմամբ, ոստիկանությունը հայտնել է, որ ձերբակալել է երեք ցուցարարի, երբ նրանցից ոմանք առարկաներ են նետել ոստիկանների վուղղությամբ  և փորձել են ճեղքել դատարանի շուրջ անվտանգության ցանկապատը։

Միևնույն ժամանակ, Լեհաստանի նախագահ Կարոլ Նավրոցկին, ով դեմ է եվրոպամետ կառավարությանը, ուրբաթ երեկոյան հետ է շրջել իր ինքնաթիռը Սենեգալ թռիչքի ժամանակ և վերադարձել է՝ ստեղծված իրավիճակի պատճառով։

«Նման պահին նախագահը պետք է Լեհաստանում լինի: Չեղարկում եմ Սենեգալ իմ թռիչքը։ Ես վերադառնում եմ», - գրել է նա։ 

Լեհաստան վերադառնալուց հետո Նավրոցկին, չնայած տիրող քաոսին, մուտք  է գործել Սահմանադրական տրիբունալ և հայտնել, որ օգնել է նաև դատարանի՝ պաշտոնավարումը կասեցված նախագահին մուտք գործել շենք։

Շաբաթ առավոտյան Նավրոցկին հայտարարել է, որ տեղի է ունեցել «Լեհաստանի սահմանադրական կարգի խախտում», և խորհրդարանական խմբակցությունների ղեկավարներին հրավիրել է  շաբաթ օրը կայանալիք հրատապ հանդիպման՝ նվիրված «քաղաքական իրավիճակի կայունացմանը»։

Երկար ժամանակ վեճերի կենտրոնում գտնվող Սահմանադրական դատարանի շուրջ բողոքի ակցիաները, ամենայն հավանականությամբ, կսրեն հակամարտությունը Լեհաստանի եվրոպամետ կառավարության և նրա ընդդիմախոսների՝ հատկապես հիմնական ընդդիմադիր ուժի՝ ազգային-պահպանողական «Օրենք և արդարություն» (PiS) կուսակցության միջև։ Լեհաստանի բարձրագույն դատական ​​մարմինները, այդ թվում՝ Սահմանադրական դատարանը, երկու կողմերի միջև լուրջ տարաձայնությունների առարկա են դարձել։