Nokia-ն, Ericsson-ը միավորվել են բջջային կապի այլ հսկաների հետ

09:10 • 16.04.08

Աշխարհում մի շարք հսկա տեխնոլոգիական ընկերություններ համաձայնության են եկել «Երկարաժամկետ էվոլյուցիա» (Long Term Evolution կամ LTE) բջջային ցանցերի զարգացող տեխնոլոգիայի պատենտները լիցենզավորելու վերաբերյալ։
Աշխարհում բջջային հեռախոսներ արտադրող ամենամեծ Nokia ընկերությունը և բջջային ցանցերի սարքավորումներ արտադրող Ericsson ընկերությունը հայտարարել են, որ նոր տեխնոլոգիայի տարածումն արագացնելու նպատակով նրանք պատրաստ են «արդար և չափավոր» պայմաններով լիցենզավորել իրենց պատենտները։

LTE տեխնոլոգիայի կիրառումը կարագացնի բջջային հեռախոսների միջև տեսանյութերի փոխանակման և երաժշտության ներբեռնման արագությունը։ Սակայն նման ծրագրերը ցանցային սարքավորումներ արտադրող ինդուստրիայի համար դեռ երկար ժամանակ եկամուտների աղբյուր չեն լինի. առաջին ցանցերի գործարկումը նախատեսվում է երկու տարուց ոչ շուտ, և բազմաթիվ օպերատորներ կնախընտրեն սպասել, մինչև որ տեխնոլոգիան վերջնականապես զարգանա։

«Այս հայտարարությունը լիցենզավորման ծախսերի կանխատեսելիության և թափանցիկության մեծացման ուղղությամբ կատարված քայլ է, ինչը նպաստելու է նոր տեխնոլոգիաների ավելի արագ որդեգրմանը»,- մեկնաբանել է Nokia-ում մտավոր սեփականության իրավունքների բաժնի տնօրեն Իլկա Ռահնաստոն։

Ընկերությունները համաձայնել են լիցենզավորման դիմաց կատարվող վճարումների մակարդակը LTE պատենտների համար սահմանել բջջային հեռախոսների վաճառքի գնի 10%-ից ցածր։ LTE տեխնոլոգիայով զինված նոութբուքների համար վճարումը չի գերազանցի $10-ը։

Համաձայնության հասած խմբի մեջ ներառված են Alcatel-Lucent-ը, NEC-ը, NextWave Wireless-ը, Nokia Siemens Networks-ը և Sony Ericsson-ը։ ԱՄՆ-ի` մեծությամբ երկրորդ Verizon Wireless բջջային հեռախոսների ծառայությունը աշխարհում բջջային կապ ապահովող ամենամեծ China Mobile ընկերության հետ LTE ցանցի կառուցման որոշում է կայացրել։ Նրանց առաջին ցանցը պետք է փորձարկվի 2008թ.։

Նոր տեխնոլոգիայի զարգացումը և մարկետինգը ապահովելու համար համատեղ գործարք են կնքել նաև Alcatel-Lucent-ը և ճապոնական NEC ընկերությունը։ Նույնիսկ Qualcomm ընկերությունն է LTE տեխնոլոգիայի համար նոր չիպեր խոստացել, չնայած LTE-ն Qualcomm-ի Ultra Mobile Broadband տեխնոլոգիայի մրցակիցն է։