«Շարունակական բժշկության կրթություն» ծրագրի շրջանակներում այս տարի կվերապատրաստվի հանրապետության 48 բժիշկ
Հանրապետության ևս 48 բժիշկ այս տարի կվերապատրաստվի Հայ օգնության հիմնադրամի նախաձեռնությամբ իրականացվող «Շարունակական բժշկության կրթություն» ծրագրի շրջանակներում։ Ծրագրի համակարգող Համբարձում Սիմոնյանի խոսքով՝ Երևանի առաջատար կլինիկաներում այս տարի արդեն վերապատրաստվել է Հայաստանի տարբեր մարզերի 22 բժիշկ։
Վերապատրաստվել ցանկացողների ընտրությունը կատարվում է նախնական ուսումնասիրությունների արդյունքում։
«Մենք կատարում ենք շրջայցեր, տեղում կազմակերպում հանդիպումներ, ուսումնասիրում իրավիճակը, վերջին տարիներին վերապատրաստման ծրագրերին բժիշկի մասնակցությունը` ըստ այդմ էլ կատարելով ընտրություն։ Հիվանդանոցների վերաբերյալ տեղեկատվություն ստանում ենք նաև ՀՀ առողջապահության նախարարությունից»,- նշեց Հ. Սիմոնյանը։
Նրա տեղեկացմամբ՝ վերապատրաստվում է ամսական 4 բժիշկ մեկ ամիս ժամկետով։ Տարվա մեջ մեկ անգամ կազմակերպվում է հանդիպում ծրագրի շրջանակներում վերապատրաստված բոլոր բժիշկների հետ, որի նպատակը որակավորման դասընթաց անցկացնելն է։ Նախատեսվում է այս տարվա հավաքը կազմակերպել աշնանը։
«Սա մի գործընթաց է, որը նպաստում է ծրագրի հետագա ընդլայնմանն ու զարգացմանը»,- ավելացրեց Հ. Սիմոնյանը։
Ծրագրի շրջանակներում նախատեսվում է նաև համապատասխան բուժսարքավորումների տրամադրում մարզային այն հիվանդանոցներին, որոնք դրանց առավել կարիքն ունեն։










