Որո՞նք են հղի կանանց մահացության հիմնական պատճառները. հրապարակվել է հերթական զեկույցը

Հղիության հետ կապված պատճառներով աշխարհում կանանց մահացության թվի նվազում է արձանագրվել, սակայն ամեն օր դեռ 1000 կին է մահանում։

Առողջապահության համաշխարհային կազմակերպության, ՄԱԿ-ի մանկական և բնակչության հիմնադրամների և Համաշխարհային բանկի հրապարակված «Մանկական մահացության միտումները» նոր զեկույցի համաձայն՝ աշխարհում հղիության և ծննդաբերության ընթացքում առաջացող բարդություններից մահացող կանանց թիվը նվազել է 34 տոկոսով՝ 1990թ. գրացված 546 000 հազար դեպքից 2008թ. հասնելով 358 000-ի։

Ըստ զեկույցի՝ կանանց մահացության կրճատման ցուցանիշը սահմանվածի կեսից էլ քիչ է Հազարամյակի զարգացման նպատակների մայրական մահացության թիրախին հասնելու համար, որի համաձայն՝ 1990-2015թթ. մայրական մահացության ցուցանիշը պետք է կրճատվի 75 տոկոսով։ Դրան հասնելու համար անհրաժեշտ է, որպեսզի այդ ցուցանիշը տարեկան կրճատվի 5.5 տոկոսով՝ այսօրվա 2.3 տոկոսի փոխարեն։

Հղի կանայք մահանում են հիմնականում ծննդաբերությանը հաջորդող արյունահոսությունից, վարակներից, զարկերակային գերճնշումից և ոչ անվտանգ պայմաններում կատարված աբորտներից։

Հղիության հետ կապված բարդություններից մահացության ցուցանիշը զարգացող երկրների կանանց շրջանում 36 անգամ ավելի բարձր է, քան զարգացած երկրների կանանց մոտ։