Բեղերի միջազգային առաջին կինոփառատոնն աշխարհում

ԱՄՆ-ի Պորտլենդ քաղաքում տեղի կունենա աշխարհում առաջին կինոփառատոնը, որը նվիրված կլինի բեղերին՝ տեղեկացնում է Reuters լրատվական գործակալությունը հավելելով, որ այս յուրահատուկ կինոփառատոնի կազմակերպիչը No Umbrella Media ընկերությունն է։

Ելնելով նրանից, որ Պորտլենդում ամեն տարի տեղի է ունենում բեղերի մրցույթ, No Umbrella Media ընկերության ներկայացուցիչները որոշելով զարգացնել այն, կազմակերպել են նաև կինոփառատոն։

Բեղերի միջազգային կինոփառատոնը կսկսվի մարտի 30-ին։ Փառատոնին կարող են հայտ ներկայացնել միայն կարճամետրաժ ֆիլմերը, որոնց տևողությունը չի գերազանցում 8 րոպեն։

Ֆիլմերի հիմնական գաղափարը պետք է առնչվի բեղերին կամ գլխավոր հերոսները բեղեր ունենան։

Լավագույն ֆիլմի հեղինակը $100 դրամական մրցանակ կստանա։ Կտրվեն նաև մրցանակներ «Լավագույն համր ֆիլմ», «Բեղերի թրաշման լավագույն ֆիլմ», «Լավագույն բեղերի ընտրություն» անվանակարգերում։