«Արի տուն» կոշիկները տիրոջը տուն են տանում աշխարհի ցանկացած կետից (լուսանկարներ)

Լոնդոնի Հոքսթոնի հրապարակում ցուցադրվել են կոշիկներ, որոնք իրենց տերերին «վերադարձնում» են տուն. հատուկ սարքավորմամբ համալրված ոտնամաններն իրենց տերերին ցույց են տալիս տան ճանապարհը և հեռավորությունը:

Առավել քան յուրօրինակ կոշիկները ներկայացրել է KK Outlet գործակալությունը, որը մասնագիտացած է օրիգինալ արտադրանքի ասպարեզում, մասնավորապես՝ հագուստի ու ժամանակակից տեխնոլոգիաների գծով:

Տուն տանող կոշիկների համար ընտրվել է «Տունն ուրիշ է» կարգախոսը (No Place Like Home Shoes)` հայտնի «Օզ երկրի զարմանալի հրաշագործը» բրիտանական հեքիաթից, որի հերոսուհի Դորոթին կարողանում է տուն վերադառնալ կոշիկի միջոցով:

Կոշիկը ստեղծած դիզայներ Դոմինիկ Ուիլքոքսը նշել է, որ իր ստեղծածի մեջ, սակայն, ոչ մի մոգություն չկա: Կոշիկի մեջ պարզապես GPS նավիգատոր է ներկառուցված, որը կարելի է USB պորտով միացնել տան համակարգչին՝ նշելով կոորդինատներ:

Ձախ կոշիկը համալրված է լուսային ինդիկատորով, որը կողմնացույց է հիշեցնում՝ թույլ տալով կողմնորոշվել տարածության մեջ: Աջ կոշիկը «զարդարված»է լուսային գծով, որը ցույց է տալիս, թե ինչ հեռավորության վրա է մարդն իր տնից: