«Ֆորսաժ 6»-ում կնկարահանվեն Subaru BRZ-ը, Pagani Zonda-ն և տանկեր (տեսանյութ)

Subaru BRZ-ը կնկարահանվի ավտոմոբիլային Fast&Furious կինոէպապեայի 6-րդ մասում: Subaru ընկերությունը նկարահանումների համար տրամադրել է մի քանի սպորտային կուպեներ, որոնց կընկերակցեն ամերիկյան դասական և ժամանակակից եվրոպական սուպերմեքենաներ, հաղորդում է auto.vesti.ru-ն:

Ֆիլմի նկարահանումները մեկնարկել են Հոլիվուդում `Fast Six աշխատանքային անվանումով: Ֆիլմը պետք է էկրանին հայտնվի հաջորդ տարվա մայիսի 2-ին:

Մինչ այդ, ամենայն հավանականությամբ, ֆիլմի շուրջ բազմաթիվ ասեկոսեներ և ենթադրություններ կտարածվեն: Դրանցից ամենաթարմը, որը բարձրաձայնել է Motor Trend պորտալը, այն է, որ Subaru-ն հինգ BRZ կուպե է տրամադրել, որոնք միանգամից կատարելագործման և հատուկ նախապատրաստման են ենթարկվել:

Մեքենաները մրցարշավային կախոցներ, մեծ անվասկավառակներ և տուրբոներմղման համակարգ են ստացել: Թե ինչպես կօգտագործվեն BRZ-ները և ով դրանք կվարի ֆիլմում, դեռ անհայտ է:

Այլ տեղեկություններով, ֆիլմում կերևա ամբողջովին կարբոնային Pagani Zonda-ն, որը պատրաստված է հատուկ Fast Six-ի համար:

Բացի դասական ամերիկյան ավտոմեքենաներից և գերթանկարժեք եվրոպական սուպերմեքենաներից, համացանցում հայտնված տեսանյութում երևում է Տեներիվե կղզում նկարահանված ֆիլմից մի հատված, որտեղ մասնակցում են տանկեր և այլ իրական ռազմական մեքենաներ:

Fast Six-ում գլխավոր դերերը, ավանդության համաձայն, կկատարեն Վին Դիզելը, Փոլ Ուոքերը Միշել Ռոդրիգեսը և 5-րդ մասից նրանց միացած Դուեյն «Ժայռ» Ջոնսոնը: Լուրեր կան նաև, որ ֆիլմի փոքր էպիզոդում կհայտնվի նաև «Փոխադրողը» ֆիլմի գլխավոր հերոս Ջեյսոն Ստետեմը: