Մարդինում հայ ճարտարապետի կառուցած փոստային բաժանմունքի պատմական շենքը կվերածվի հյուրանոցի

Թուրքիայի Մարդին քաղաքում հայ ճարտարապետի կառուցած և աշխարհի ամենատեսարժան 7-րդ փոստային բաժանմունքը համարվող շինությունը վերանորոգվում է, տեղեկացնում է «Ակօս»-ը։

Հայազգի ճարտարապետ Սարգիս Լոլեի կառուցած շինությունը վերակառուցումից հետո վերածվելու է հյուրանոցի։

Մարդինի ճարտարապետության ամենակարևոր շինություններից մեկը համարվող 125-ամյա շենքի վերակառուցման աշխատանքներն իրականացնում է  Տուրիզմի և հյուրանոցների բարձրագույն դպրոցը։
 

1890թ.-ին հայ ճարտարապետի կողմից այն կառուցվել է որպես հեռագրատուն։ 2011թ.-ին շինությունը համարվել է աշխարհի ամենադիտարժան 10 փոստային բաժանմունքներից 7-րդը։

Բարձրագույն դպրոցը շենքը վարձակալել է 10 տարով։ Դպրոցի տնօրինությունը մտադիր է այդ կերպ միավորել զբոսաշրջությունը և կրթությունը՝ զբոսաշրջիկների հոսք ապահովելով դեպի Մարդին։