Թբիլիսահայերը բարեգործական համերգ են կազմակերպել՝ սիրիահայերին օգնելու համար

Թբիլիսիում տեղի հայ համայնքային կառույցների նախաձեռնությամբ իրականացվող «Օգնենք Հալեպ քաղաքի հայկական թաղամասերի բնակիչներին» շարքի բարեգործական միջոցառումների շրջանակներում Վանո Սարաջիշվիլու անվան կոնսերվատորիայի Փոքր դահլիճում կայացել է դասական երաժշտության համերգ, որին իրենց մասնակցությունն են բերել տարբեր ազգության անվանի կատարողներ:

Համերգին ներկա են եղել Վրաստանում ՀՀ արտակարգ և լիազոր դեսպան պարոն Հովհաննես Մանուկյանը, Վիրահայոց Թեմի առաջնորդ Գերաշնորհ Տեր Վազգեն եպիսկոպոս Միրզախանյանը, հոգևոր դասը, Վրաստանում ՀՀ դեսպանության անձնակազմը, Թբիլիսիում գործող հայկական հասարակական կազմակերպությունների մի շարք ներկայացուցիչներ, ինչպես նաև վրացի և օտարերկրյա հյուրեր:

Համերգը սկսվել է մարտական գործողությունների հետևանքով ռմբակոծությունների ենթարկված Սիրիայի Հալեպ քաղաքի հայկական թաղամասի ներկա իրավիճակն և առօրյան արտացոլող կադրերի ցուցադրմամբ:

Համերգի հրավիրատոմսերի վաճառքից գոյացած ողջ հասույթը նախատեսված է փոխանցել սիրիահայերի օգնության ֆոնդին:
Դրամական հանգանակությամբ հանդես է եկավ նաև Վրաստանում ՀՀ դեսպանությունը` արտակարգ և լիազոր դեսպան Հովհաննես Մանուկյանի գլխավորությամբ:

Բարեգործական համերգին մասնակցության համար կազմկոմիտեն շնորհակալագրեր է հանձնել համերգի բոլոր մասնակիցներին: