Լոնդոնում տեղի է ունեցել Brit Awards մրցանակաբաշխությունը

Լոնդոնում փետրվարի 20-ին անցկացվել է ամենամյա տոնական միջոցառում՝ Brit Awards երաժշտական մրցանակաբաշխությունը, հայտնում է ռուսական Лента լրատվական կայքը։

Հիմնական մրցանակակիրներն են դարձել շոտլանդացի կատարող Էմելի Սանդեն և բրիտանացի երգիչ Բեն Հովարդը։

Սանդեն պարգևատրվել է «Լավագույն բրիտանացի երգչուհի» և «Տարվա բրիտանական ալբոմ» անվանակարգերում։ Հովարդը ստացել է մրցանակներ «Տարվա բացահայտում» և «Լավագույն բրիտանացի երգիչ» անվանակարգերում։

Լավագույն բրիտանական խումբ է ճանաչվել Mumford & Sons ֆոլկ-խումբը, իսկ լավագույն կենդանի կատարման համար պարգևատրվել է Coldplay խումբը։

Նախորդ տարվա մրցանակաբաշխության հաղթող երգչուհի Ադելն այս անգամ արժանացել է մրցանակի «Լավագույն բրիտանական երգ» (Skyfall երգի համար) անվանակարգում։

Լավագույն արտասահմանցի կատարողներ են ճանաչվել երգչուհի Լանա Դել Ռեյը և ռեփեր Ֆրենկ Օուշենը, իսկ լավագույն արտասահմանցի խումբ՝ The Black Keys ամերիկյան դուետը։