Եղանակն՝ այսօր
Թերթերը պահպանում են մայրենին, կայքերում լուրջ թերություններ, կարծես, չկան. Սերգո Երիցյան
Լեզվի պետական տեսչության պետ Սերգո Երիցյանի կարծիքով՝ Հայաստանում տպագրվող հայալեզու թերթերում մայրենի լեզվի հետ կապված խնդիրները վերջին տարիներին կարգավորվել են, էլեկտրոնային մամուլում լուրջ թերություններ, կարծես թե, չկան:
«Սա մի փուլ էր, որտեղ շատ դժվարություններ կային, բայց անցան, գնացին: Իսկ ինչ վերաբերում է հեռուստատեսային լեզվին, պետք է ասեմ, որ մենք հատկապես ուսումնասիրել ենք «Հայլուրի» (նկատի ունի «Առաջին լրատվական» հաղորդումը – Tert.am) լեզուն, և պետք է ասեմ, որ այստեղ լուրջ թերություններ չունենք: Լեզվական կամ բառակերտման հետ կապված մեծ դժվարություններ չունենք այստեղ»,- այսօր լրագրողների հետ հանդիպմանն ասաց նա:
Սերգո Երիցյանն այնուհետև անդրադարձավ լրատվական կայքերի լեզվին և նշեց, որ արագության պատճառով այստեղ սխալներ շատ են լինում։
«Իհարկե, լինում են տառասխալներ ու ոչ ճիշտ բառերի օգտագործում, բայց պետք է նկատել, որ առաջին անգամ նյութը արագ տեղադրելուց հետո սկսում են փոխել, ուղղումներ անել: Ես կարծես թե, չեմ համարում, որ լուրջ թերություններ ունենք: Բայց ժամանակն է, որ բոլորը ունենան խմբագրի ուժեղ աչք, որքան էլ մեր լրագրողները գրագետ են, բայց ցանկացած հմուտ լրագրողի համար խմբագրի աչքի կարիքը կա»,- նկատեց նա:
Սերգո Երիցյանն անդրադարձավ նաև սերիալներում մայրենի լեզվի օգտագործման ձևերին ու նշեց, որ քանի որ դրանք անխուսափելի են, լավ կլիներ, որ նկարահանվեին գրագետ հայերենով:
«Դրանք բերան ծամածռելով են, դեմքեր ծամածռել, ու՞ր կորավ մեր դրամատուրգիան, պետք է տպավորվել դրամատուրգիայի միջոցով, ոչ թե ծամածռությամբ։ Մաքուր հայերենով կարելի է ամեն ինչ նկարահանել: Շարունակում են փողոցային լեզուն, բայց մենք իրավունք չունենք տուգանել, դրանով զբաղվում է ՀՌԱՀ-ը»,-ասաց նա:
Studio One