Շուտով ջերմաստիճանը Երկրի վրա ամենաբարձրը կլինի վերջին 11.000 տարվա մեջ

Science հանդեսում հրապարակված նոր ուսումնասիրության մեջ նշվում է, որ շուտով մեր Երկրում ջերմաստիճանը կհասնի վերջին 11.000 տարվա մեջ ամենաբարձր կետին, հայտնում է «Ամերիկայի ձայնի» ռուսական ծառայությունը:

Այս տվյալները հիմնված են բրածո նյութերի ուսումնասիրության վրա, որոնք հայտնաբերվել են աշխարհի տարբեր անկյուններում: Դրանց հիման վրա գիտնականները վերստեղծել են համաշխարհային ջերմաստիճանի դինամիկան վերջին սառցե դարաշրջանի ավարտից ի վեր:

Գիտնականները եկել են նաև այն եզրակացության, որը 1910-ից սկսած կտրուկ տաքացումից հետո Երկրի վրա ջերմաստիճանը զգալի իջած է եղել: Նշվում է նաև, որ վերջին տասնամյակը ամենատաքն է եղել դիտումների ամբողջ պատմության մեջ:

Գիտնականները նշել են, որ դրա պատճառը մարդու կենսագործունեությունն է՝ մեքենաների կողմից ու արդյունաբերական ձեռնարկությունների օդի աղտոտումը: Այլ գիտնականներ գտնում են, որ գլոբալ տաքացումը բնական գործոններով է պայմանավորված: