Չինաստանում ցուցադրվել է «Վանա ծովուն արշալույսը» ֆիլմը

Մարտի 9-ին Պեկինի լեզվի և մշակույթի համալսարանում (BLCU) Չինաստանում անցկացվող ֆրանկոֆոնիայի միջազգային կինոփառատոնի շրջանակներում ՉԺՀ-ում ՀՀ դեսպանության աջակցությամբ տեղի է ունեցել հայ ժամանակակից կինոռեժիսորներ Արտակ Իգիթյանի և Վահան Ստեփանյանի «Վանա ծովուն արշալույսը» ֆիլմի ցուցադրումը: Այս մասին տեղեկանում ենք ՀՀ ԱԳ նախարարության լրատվական ծառայության տարածած հաղորդագրությունից։
 

Մեծ Եղեռնը վերապրած և ԱՄՆ ներգաղթած հայ ընտանիքի մասին պատմող այս ֆիլմը դիտել են Պեկինի տարբեր համալսարանների ուսանողներ, որոնց շարքում էին նաև Պեկինում սովորող հայ երիտասարդները: Ֆիլմը ցուցադրվել է հայերենով և ուղեկցվել ֆրանսերեն ու չինարեն սուբտիտրերով:

Ֆրանկոֆոնիայի կինոփառատոնի շրջանակներում «Վանա ծովուն արշալույսը» ֆիլմը մարտի 10-ին ցուցադրվել է նաև Շանհայ քաղաքում: