Հռոմի նորընտիր պապի գրքերը վաճառքի ռեկորդներ են սահմանել

Հռոմի նորընտիր պապ Ֆրանցիսկոսի հեղինակած գրքերը, ինչպես նաև նրա կենսագրությանը նվիրված աշխատությունները վաճառքի ռեկորդներ են սահմանել Արգենտինայում՝ դառնալով առցանց խանութների բեսթսելլերներ։

Ինչպես նշում է Euromag-ը, Պապական գահին ընտրվելուց 2 ժամ անց միայն Bajalibros.com պորտալի օգտատերերը գնել են պոնտիֆիկոսի գրած և նրա մասին 1.000-ից ավելի թվային գիրք։ Իսկ հաջորդ 2 օրերին պահանջարկն անասելի աճել է՝ սահմանելով ռեկորդային ցուցանիշներ։

Հռոմեական կաթոլիկ եկեղեցու նոր հովվապետի գրքերը պատվիրել են ոչ միայն Լատինական Ամերիկայից, այլ նաև ԱՄՆ-ից, Եվրոպայից և նույնիսկ Վատիկանից։

Նման պատկեր է ստեղծվել նաև տպագիր գրքերի պարագայում. Արգենտինայի հյուսիսում գտնվող 2 քաղաքներում՝ Սալտայի և Սանտյագո դե Էստերոյի խանութներում հաշված ժամերի ընթացքում այցելուները գնել են պոնտիֆիկոսի մասին բոլոր գրքերը։