Հայազգի ռեժիսոր Թալին Ավագյանի «Demi Pointe» ֆիլմը կցուցադրվի հեղինակավոր Բոստոնի միջազգային կինոփառատոնում

Հայազգի երիտասարդ ռեժիսոր Թալին Ավագյանի նկարահանած «Demi Pointe» կարճամետրաժ ֆիլմը կցուցադրվի Բոստոնի միջազգային կինոփառատոնի (BIFF) շրջանակներում, որը կանցկացվի ապրիլի 12-21-ը։ Այս մասին տեղեկացնում է The Armenian Weekly-ն։

Բոստոնի միջազգային կինոփառատոնը համարվում է Միացյալ Նահանգների խոշորագույն նմանատիպ միջոցառումներից մեկը։ Պարբերականը նշում է, որ այս տարի «Demi Pointe» ֆիլմն ընտրվել է ներկայացած 2.600 ֆիլմերի շարքից։

«Demi Pointe»-ը (գլխավոր դերերում՝ Սիդնի Փենի, Ռեյչել Սքոթ, Ռոբին Էն Ռապոպոտ, Էմի Ֆրիդման)  պատմում է փոքրիկ աղջկա՝ Սիդնիի մասին, ով պայքարում է խոսել սովորելու համար։ Նա խնդիրներ ունի բանավոր խոսքի հետ, ինչը վերացնելու նպատակով այցելում է մասնագետի մոտ։

Մասնագետի ճիշտ մոտեցման շնորհիվ Սիդնին մեծ առաջընթաց է ունենում և իր ու մյուսների համար անսպասելիորեն բացահայտում մեծ սեր բալետի նկատմամբ։ Արդյունքում հենց բալետն էլ դառնում է աղջկա ինքնարտահայտման և հաղորդակցվելու այլընտրանքային միջոցը։