Եղանակն՝ այսօր
Հայկական կինոյի 15 լավագույնները. կայացավ «Հայակ» ազգային կինոյի մրցանակաբաշխությունը (լուսանկարներ)
«Արամ Խաչատրյան» մեծ համերգասրահում կայացավ «Հայակ» ազգային կինոյի մրցանակաբաշխության 2-րդ հանդիսավոր արարողությունը, որն այս անգամ աչքի ընկավ նաև երեկոյի բեմադրական մասով: Հյուրերից ռեժիսոր Կարեն Շահնազարովը նկատեց, որ կարելի էր հատուկ մրցանակ տալ նաև արարողության բեմադրիչին:
Իսկ երեկոյի ընթացքում մրցանակների արժանացան հետևյալ ֆիլմերն ու կինոգործիչները:
«Լավագույն ռեժիսոր» անվանակարգում մրցանակը շնորհվեց Հարություն Խաչատրյանին` «Անվերջ փախուստ, հավերժ վերադարձ» ֆիլմի համար: Սակայն անվանի ռեժիսորը, ժյուրիից ներողություն խնդրելով, իր մրցանակը շնորհեց երիտասարդ ռեժիսոր Մարիա Սահակյանին («Այդ ես չեմ» )` ցանկանալով այդ կերպ խրախուսել ավելի երիտասարդ գործիչներին: Քիչ անց, սակայն Մարիան ստացավ նաև իր մրցանակը. նրա «Այդ ես չեմ» աշխատանքը ճանաչվեց «Լավագույն խաղարկային ֆիլմ»:
«Լավագույն օպերատոր» անվանակարգում մրցանակ շնորհվեց Մկրտիչ Մալխասյանին` «Այդ ես չեմ» ֆիլմի համար: Նա առաջադրված էր նաև «Գարեգին Նժդեհ» ֆիլմի համար իր օպերատորական աշխատանքով:
«Լավագույն սցենարի հեղինակ»` Թերեզա Վարժապետյան – Միքայել Պողոսյան («Եթե բոլորը»):
«Լավագույն նկարիչ»` Արմեն Ղազարյան («Թափառում»):
«Լավագույն կոմպոզիտոր»` Վահագն Հայրապետյան («Եթե բոլորը»):
«Լավագույն դերասանուհի» անվանակարգում ներկայացվածներից (Եկատերինա Շիտովա, Մարիամ Դավթյան, Լուիզա Ներսիսյան) հաղթող ճանաչվեց Մարիամ Դավթյանը («Ձայն լռության»):
«Երկրորդական դերի լավագույն դերասանուհի» անվանակարգում առաջադրվածներից (Ժենյա Մկրտումյան, Արմինե Անդա, Ֆրիդա Յորք) մրցանակը հաձնվեց Ժենյա Մկրտումյանին («Եթե բոլորը»):
«Լավագույն դերասանի» մրցանակի համար պայքարեցին Վիգեն Չալդրանյանը, Հովհաննես Ազոյանը, Եվգենի Ցիգանովը և Շանթ Հովհաննիսյանը: Մրցանակին արժանացավ վերջինս` «Գարեգին Նժդեհ» ֆիլմի համար:
«Երկրորդական դերի լավագույն դերասան» անվանակարգում ներկայացվածներից (Կարեն Ջանգիրով, Արտաշես Ալեքսանյան, Խորեն Լևոնյան) մրցանակի արժանացավ Լևոնյանը («Գարեգին Նժդեհ»):
«Լավագույն կարճամետրաժ ֆիլմ»` Թամարա Ստեփանյանի «Փերվարի 19»-ը:
«Լավագույն վավերագրական ֆիլմ»` Հարություն Խաչատրյանի «Անվերջ փախուստ, հավերժ վերադարձը»:
«Լավագույն անիմացիոն ֆիլմ»` Նաիրա Մուրադյանի «Բալետը»:
«Լավագույն դեբյուտ»` Մարինե Զաքարյանի «Փասիանի որսորդը»:
«Լավագույն արտասահմանյան ֆիլմ» անվանակարգում ժյուրին մրցանակը շնորհել էր Կարեն Շահնազարովի «Սպիտակ վագր» ֆիլմին:
Շնորհվեցին նաև հատուկ մրցանակներ` Արմեն Ջիգարխանյանին և Ներսես Հովհաննիսյանին` կինոյում ունեցած ներդրման համար, հայկական կինոակադեմիայի մրցանակին արժանացան Արման Երիցյանի` «Donkeymentary» ֆիլմը և Պիետրո Մարչելլոյի «Փելեշյանի լռությունը» ֆիլմը, իսկ ՀՀ մշակույթի նախարարության հատուկ մրցանակը տրվեց` Վիգեն Չալդրանյանին՝ «Ձայն լռության» աշխատանքի համար:
Studio One