Մեր ապագա զինվորները. տոնական օրը Եռաբլուրում (տեսանյութ, լուսանկարներ)

Մարտական ընկերներ, հարազատներ, հերոս մայրեր, աշակերտներ, մանուկներ, հրամանատարներ, գույնզգույն ծաղիկներ. հավերժ քուն մտած անմահ հերոսների շիրիմներին այցելող մարդկանց հոսքից բազմամարդ էր այսօր Եռաբլուրի բարձունքը: Ահա այսպես է հարգում իր հերոսների հիշատակը հայ մարդն ու հարգանքը փոխանցում սերունդներին։

Tert.am-ի հատուկ ուշադրությանն այսօր արժանացան փոքրիկները: 6-ամյա Կորյունը, ով Արցախյան ազատամարտին մասնակցած պապիկի անունն էր կրում, այսօր Եռաբլուր էր այցելել զինվորի տոնական համազգեստով: Երեխան գիտեր, թե ուր էր եկել, ավելին՝ գիտեր նաև, թե ինչ է արել իր պապիկը պատերազմում: «Եկել եմ Եռաբլուր, որ ծաղիկ դնեմ, պապիկիս ընկերներն են այստեղ: Որ մեծանամ, զինվոր եմ դառնալու, պապիկիս գործն եմ շարունակելու, Հայաստանը պաշտպանելու եմ»,- մեզ հետ զրույցում ասաց Կորյունը:

«Եկել եմ էն ամանի մեջ ծաղիկ դնեմ, Համլետ քեռու մոտ եմ եկել, Համլետ քեռին լավ բան ա արել»,-ասաց 3-ամյա Դավիթ Եղիշյանը:

Իր Արսեն հորեղբորն այցելած փոքրիկը նույնպես համազգեստով էր Եռաբլուրում: «Եկել եմ ու պաչել եմ Արսեն հոպարին»,-ասաց նա և ավելացրեց, իր այդ համազգեստը միայն Եռաբլուր գալիս է հագնում: