Գոռ Սուջյանը «այլմոլորակային» երգիչ է. երգչուհի Գայանե Հովհաննիսյան

ՀՀ վաստակավոր արտիստուհի, երգչուհի Գայանե Հովհաննիսյանը համարում է, որ «Եվրատեսիլ 2013» երգի մրցույթին Հայաստանը ներկայացրած «Դորիանս» խմբի՝ մասնավորապես, երգիչ Գոռ Սուջյանի ելույթն առանձնահատուկ է:

Այսօր լրագրողների հետ հանդիպմանը իր կարծիքը կիսելով՝ երգչուհին ցավով նշեց, որ թեև «Դորիանսը» արդյունքում գրավեց 18-րդ տեղը, սակայն իր համար Գոռ Սուջյանը շարունակում է մնալ դրական իմաստով «այլմոլորակային երգիչ»:

«Այն ձայնային տվյալները, տեմբրը, խարիզմատիկան, որ ունի Գոռը, այնքան յուրահատուկ է, որ չի կարելի նրան չսիրել ու չգնահատել: Ինչ վերաբերում է մրցույթին, չեմ կարող ասել, որ լավ համարներ չկային, բայց Գոռի ելույթը ինձ համար առանձնացավ իր ամեն ինչով»,- ասաց նա:

Գայանե Հովհաննիսյանը, անդրադառնալով «Դորիանս» ռոք խմբի ներկայացրած Lonley Planet երգին ուղղված քննադատություններին՝ նշեց, որ իրեն դուր է եկել երգը, սակայն իր կարծիքով զգացվեց բեմադրության պակաս:

«Գնում են խոսակցություններ, որ ռոք խումբ է, պարտադիր չէ, որ բեմադրություն լինի: Այս կատարման դեպքում բեմադրություն պետք է լիներ և դրանից կախված տպավորությունը կլիներ ուրիշ: Սակայն վստահ եմ, որ նրանք չեն կոտրվի, քանի որ շատ տաղանդավոր ռոք խումբ են»,- ասաց նա:

Մամուլի ասուլիսին ներկա էր նաև Մոսկվայի «Զվարթնոց» հայկական մշակութային հիմնադրամի նախագահ, և մշակութային գործիչ Անժելա Ստեփանյանը, ով Գոռ Սուջյանի կատարումը հրաշալի համարեց և նշեց, որ Հայաստանը ամեն տարի տաղանդավոր երգիչներ ու հրաշալի երգեր է ներկայացնում մրցույթին: Սակայն ըստ նրա ժամանակավոր դադար է անհրաժեշտ Հայաստանին:

«Երկու տարի գոնե, որ չմասնակցենք, կարծում եմ դրանից հետո այնքան չեն քննադատվի մասնակցող երգիչները: Բայց եկեք նկատի ունենանք, որ մի քիչ քաղաքական հարցեր կան, դրա համար չպետք է խառնվենք, չպետք է քարկոծենք։ Երգը լսողի համար երևում էր, որ երգիչը իսկապես երգիչ է»,- ասաց նա: