Ջենիֆեր Լոպեսի ներկայացուցիչներն արձագանքել են Թուրքմենստանի նախագահի համար հնչած երգի քննադատությանը

Երգչուհի Ջենիֆեր Լոպեսի ներկայացուցիչներն արձագանքել են Թուրքմենստանի նախագահ Գուրբանգուլի Բերդիմուհամեդովի ծննդյան օրվա ելույթի վերաբերյալ հնչած քննադատությանը. նրանց խոսքով՝ երգչուհին չէր մասնակցի համերգին, եթե իմանար իրավապաշտպանների մեղադրանքների մասին, հայտնում է РИА Новости-ն։

Ավելի վաղ նշվում էր, որ Լոպեսը ելույթ է ունեցել Թուրքմենստանի նախագահի ծննդյան օրը՝ կատարելով «Happy birthday, Mr. president!» երգը։ Մարդու իրավունքների պաշտպանության հիմնադրամը (HRF) քննադատության է ենթարկել երգչուհուն, ով մասնակցում է Amnesty International կազմակերպության՝ Մեքսիկայում կանանց իրավունքների պաշտպանության ծրագրին։

«Լոպեսի ներկայացուցչի հայտարարությունում նշվում է, որ երգչուհին չէր այցելի տվյալ միջոցառմանը, եթե իմանար մարդու իրավունքների խախտման վերաբերյալ մեղադրանքների մասին»,- նշում է ամերիկյան Star Tribune-ը։

Ըստ ԶԼՄ-ների չհաստատված տվյալների՝ Լոպեսի այցը կազմակերպվել էր Չինական ազգային նավթագազային կորպորացիայի կողմից (CNPC)։ Ընդ որում՝ նախագահին նվիրված երգը կատարելու խնդրանքը հնչել է համերգից առաջ վերջին պահին, և երգչուհին «սիրով համաձայնվել» է կատարել այն։