Հյուրանոցներ-նկարահանման հրապարակներ. LHW հյուրանոցային ասոցիացիայի 85-ամյակին նվիրված շարք (լուսանկարներ)

The Leading Hotels of the World (LHW) հյուրանոցային բիզնեսի խոշորագույն ասոցիացիան այս տարի նշում է իր հիմնադրման 85-ամյակը, գրում է buro247.ru-ն։

LHW թիմը ներկայացնում է հոբելյանին նվիրված շարք հայտնի ֆիլմերի մասին, որոնց էպիզոդները տարբեր ժամանակներում նկարահանվել են ընկերությանը պատկանող հյուրանոցներում։

LHW-ն ունի ավելի քան 430 հյուրանոցային համալիր և մինի հյուրանոց, հանգստավայրեր և սպա-սրահներ, որոնք գտնվում են աշխարհի 80 երկրներում։ Ամենահայտնիներից են Ritz London և Ritz Paris հյուրանոցները, որոնցում անցկացվել են Ջուլյա Ռոբերթսի մասնակցությամբ «Նոթինգ Հիլ» ռոմանտիկ կատակերգության և Թոմ Հենքսի մասնակցությամբ «Դա Վինչիի ծածկագիրը» ֆիլմերի նկարահանումները։

Վենետիկի Cipriani&Palazzo Vendramin հյուրանոցը, որը պատկանում է Orient-Express հյուրանոցային բրենդին, հրապարակ է տրամադրել գործակալ Ջեյմս Բոնդի 21-րդ ՝ «Խաղատուն Ռոյալ» ֆիլմի նկարահանումների համար։ Այժմ հյուրանոցի յուրաքանչյուր համարում կա ֆիլմի սկավառակը։

Մեկ այլ ֆիլմ Դենիել Քրեյգի մասնակցությամբ՝ «Վիշապի դաջվածքով աղջիկը», նույնպես կապ ունի LHW  ասոցիացիայի հյուրանոցներից մեկի հետ։ Խոսքը Ցյուրիխի The Dolder Grand-ի մասին է։

«Սեքսը մեծ քաղաքում» ֆիլմի 2-րդ մասի դիտողները հավանաբար հիշում են շքեղ Taj Palace Marrakech հյուրանոցը։ Հետաքրքիր է, որ նկարահանումների ժամանակ հյուրանոցը դեռ բաց չի եղել հյուրերի համար։

Սթիվեն Սոդերբերգի «Օուշենի 11 ընկերները» ֆիլմի սյուժեն զարգանում է Լաս Վեգասի Bellagio Towers հյուրանոցում։ Այժմ հաճախորդները կարող են այցելել այն վայրերը, որտեղ նկարահանվել են ֆիլմից էպիզոդներ, այդ թվում՝ հայտնի Picasso ռեստորանը։

Վուդի Ալենի երկու ֆիլմերի ՝«Կեսգիշերը Փարիզում» և «Վիկի, Քրիստինա, Բարսելոնա» նկարահանումները նույնպես անցկացվել են LHW-ի կազմում գտնվող հյուրանոցներում. առաջինը մասամբ նկարահանվել է Hotel Le Bristol հյուրանոցում, երկրորդը՝ Hotel Casa Fuster-ում Բարսելոնայում։

Անհնար է չհիշել լեգենդար Ալֆրեդ Հիչքոքի «Մարդ, որը չափազանց շատ բան գիտեր» լրտեսական թրիլլերը։ Գլուխգործոցը նկարահանվել է Մարոկկոյի La Mamounia հյուրանոցում, որի այգիները ոգեշնչել են ռեժիսորին ստեղծել մեկ այլ հայտնի ֆիլմ «Թռչունները» անվանումով։