Սելինջերի կենսագրականի հեղինակները պնդում են՝ հեղինակի նոր գրքեր են սպասվում

Ջերոմ Դեյվիդ Սելինջերի կենսագրականի հեղինակները պնդում են, որ բացահայտել են, թե «ինչի վրա էր աշխատում «Տարեկանի արտում՝ անդունդի եզրին» վեպի հեղինակն իր կյանքի վերջին 50 տարվա ընթացքում», գրում է news.yahoo.com-ը։

2015-2020 թվականների ընթացքում Սելինջերի նոր հրատարակություններ են նախատեսվում՝ համաձայն «Սելինջեր» գրքի համահեղինակ Դեյվիդ Շիլդսի և Շանե Սալերնոյի: Իսկ «Սելինջեր» գիրքը լույս կտեսնի սեպտեմբերի 3-ին: Գրքի հեղինակները վկայակոչում են «երկու անկախ աղբյուրի», ովքեր փաստագրել և ճշտել են տեղեկությունը:

1960-ականներից հետո Սելինջերն այլև գիրք չի հրատարակել, քանի որ առհասարակ որոշել է հեռանալ հանրային կյանքից: Վերջին 50 տարվա ընթացքում անվերջանալի և իրար հակասող ենթադրություններ են արվել, թե արդյոք ինչ էր անում Սելինջերն իր մեկուսանալու տարիներին: Հայտնի է, որ Սելինջերը շարունակել է գրել: Ընկերները, հարևանները և ընտանիքի անդամները նշել են, որ իր կյանքի վերջին տարիներին Սելինջերը գրում էր: Հեղինակն ինքը 1974 թվականին ասել էր The New York Times-ին, որ ամեն օր գրում է՝ չնայած միայն իր համար:

700-էջանոց կենսագրական գիրքը շատ հետաքրքիր՝ մինչ այս անհայտ մանրամասներ է պատմում Սելինջերի կյանքի մասին, ներկայացնում է հազվագյուտ լուսանկարներ և նամակներ, աննախադեպ մանրամասներ Երկրորդ համաշխարհային պատերազմի տարիներին հեղինակի կյանքի և առաջին կարճատև ամուսնության մասին: