Բրիտանական թանգարանում առաջին անգամ կցուցադրվեն էրոտիկ բովանդակությամբ ճապոնական փորագրություններ

Բրիտանական թանգարանում առաջին անգամ կցուցադրվեն ճապոնական փորագրություններ, որոնք էրոտիկ բովանդակություն ունեն: XVII-XIX դարերի այդ պատկերները լայն հասարակությանը հասանելի չէին ավելի քան 100 տարի՝ բավականին անկեղծ բովանդակության պատճառով, հաղորդում է Вести.ru-ն՝ հղում կատարելով International Business Times-ին:

Սակայն այս փորագրությունների մեծ մասը կարելի էր հանդիպել գրքերում, որոնք նվիրված էին ճապոնական գեղանկարչությանը: Այժմ դրանք հնարավոր է դիտել «Սյունգա. Սեքսը և հաճույքը ճապոնական արվեստում» ցուցադրության շրջանակներում:

XVII-XIX դարերում Ճապոնիայում մշակութային կյանքը գտնվում էր խիստ վերահսկողության տակ, ինչի պատճառով սյունգան փորձել են մի քանի անգամ արգելել: XVIII-ի վերջում այս ուղղությունն անօրինական է դառնում: Սակայն նույնիսկ դրանից հետո էրոտիկ նկարները մեծ պահանջարկ ունեին ճապոնացիների շրջանում: Նման պատկերները բավականին թանկարժեք էին: