Վուդի Ալենը կպարգևատրվի «Ոսկե գլոբուս» մրցանակաբաշխության ժամանակ

Հաջորդ տարի «Ոսկե գլոբուս» մրցանակաբաշխության ընթացքում հերթական անգամ կշնորհվի Սեսիլ Բ. Դե Միլի անվան մրցանակը։ Կինեմատոգրաֆում ունեցած ներդրման համար շնորհվող այս ամենամյա մրցանակի թեկնածուներին որոշում է Օտարերկրյա մամուլի հոլիվուդյան ասոցիացիան։

2014թ. մրցանակը կհանձնվի ռեժիսոր Վուդի Ալենին, հայտնում է filmpro.ru-ն։

Օտարերկրյա լրագրողների մրցանակն առաջին անգամ շնորհվել է 1952-ին, այդ ժամանակ այն ստացել է ռեժիսոր Սեսիլ Բ.Դե Միլը։ Նրա պատվին էլ այն ժամանակ դեռ անհայտ մրցանակը ստացել է իր անվանումը։

Դրանից մեկ տարի անց Cecil B. DeMille Award մրցանակը շնորհվել է Ուոլթ Դիսնեյին, մրցանակակիրներ են նաև Գրեգորի Պեկը, Ալֆրեդ Հիչքոքը, Օդրի Հեփբերնը, Քլինթ Իսթվուդը, Մայքլ Դուգլասը և այլն։ Այս տարի մրցանակին արժանացել է Ջոդի Ֆոսթերը։