Իմ գեղեցկուհի մայրը. Մոնակոյի արքայազնը լեգենդար Գրեյս Քելիին նվիրված ցուցահանդես է բացել (լուսանկարներ)

Մոնակոյի արքայազն Ալբեր 2-րդն իր կնոջ՝ արքայադուստր Շառլենի հետ մասնակցել է Հոլիվուդի ամենագեղեցիկ  դերասանուհիներից մեկին՝ Գրեյս Քելիին նվիրված ցուցահանդեսի բացմանը։

Ինչպես նշում է Daily Mail-ը, ցուցահանդեսի շրջանակներում ներկայացվել են լեգենդար գեղեցկուհուն պատկանած զգեստներ, պայուսակներ, հագուստի այլ պարագաներ, հազվագյուտ լուսանկարներ ու Քելիին առնչվող այլ նմուշներ։

Ցուցահանդեսի բացումից հետո Ալբեր 2-րդը հուզիչ խոսքեր է ասել հանգուցյալ մոր մասին։
«Ամբողջ աշխարհը նրան գիտի որպես հոլիվուդյան աստղ, իսկ հետո էլ՝ որպես Մոնակոյի արքայադուստր։ Անշուշտ, նա իսկական գեղեցկուհի էր, շատ տաղանդավոր ու ոճային կին, սակայն դա նրա էության միայն մի մասն է։ Ես հույս ունեմ, որ այս ցուցահանդեսը կօգնի այցելուներին ճանաչել բոլորովին այլ Գրեյս Քելիի»,-ասել է արքայազնը։

Գրեյս Քելին ծնվել է Ֆիլադելֆիայում, սակայն 26 տարեկանում նա հեռացել է ԱՄՆ-ից ու կինոարտադրության ոլորտից՝ Մոնակոյի արքայազն Ռենեի հետ ամուսնության պատճառով։

Քելին զոհվել է 52 տարեկանում՝ ողբերգական ավտովթարի հետևանքով։