Ազնավուրի լոնդոնյան համերգի անհայտ մանրամասները. Financial Times-ի քննախոսականը

«89-ամյա երգիչը ցույց տվեց, որ իր կատարողական շնորհը իրեն չի լքել»,- գրում է Financial Times-ը` օրերս Լոնդոնի Albert Hall-ում Շառլ Ազնավուրի համերգի վերաբերյալ իր գրախոսականում:

Նշվում է, որ Ազնավուրը բեմում հայտնվեց ճիշտ ժամանակին` առանց հապաղման, հանդիսատեսը ոտքի կանգնեց և ծափողջույն հղեց նրան` մի մարդու, ով իր առաջին սկավառակը թողարկել է 60 տարի առաջ, այնպես, ինչպես դա անում են Ֆրանսիայում:

Անդրադարձում պատմվում են նաև հայտնի համերգից քիչ հայտնի դրվագներ: Այսպես՝ առաջին շարքում մի տղամարդ է եղել` «Բրավո, Շառլ, շնորհակալություն» գրությամբ պաստառով: Իսկ երբ La Bohème-ի կատարումից հետո Ազնավուրը դահլիճ է նետել իր ճերմակ թաշկինակը, մի կին ու մի տղամարդ այնպես են սկսել պայքարել դրա համար, ասես, աղբյուրի բնորոշմամբ, սրբազան մասունքի համար են պայքարում:

Նշվում է, որ Ազնավուրը կատարել է իր ավանդական վալսը, երբ ասես՝ ուրվականի հետ է պարում: Նա իր տեքստերի մեծ մասը կարդացել է հուշարարից և կատակել, թե հիշողությունը վատացել է` 91-ամյակից առաջ:

«Ինչ-որ իմաստով այդ շոուն ավելի շատ ծափահարությունների շոու էր»,- արձանագրում է FT-ն, որի գնահատականով` «ֆրանսիացի Ֆրենկ Սինատրան» վերջին կենդանի լեգենդներից է, ովքեր կապող օղակ են Էդիտ Պիաֆի դարաշրջանի և փոփ երաժշտության անհետացած պատմության հետ:

Աղբյուրը եզրափակում է իր գրախոսականը` նշելով, որ 100 րոպեանոց շոուի ավարտին Ազնավուրը լրիվ բացվել էր և ամենևին էլ հեղինակությունը չէր, որ բուռն ընդունելություն ապահովեց նրան այդ երեկո: