Անջելինա Ջոլին պատվո «Օսկար» կստանա

Ամերիկացի դերասանուհի Անջելինա Ջոլին պատվավոր «Օսկար» մրցանակ կստանա Ամերիկյան կինոակադեմիայի կողմից, հայտնում է Associated Press-ը:

Դա տեղի կունենա շաբաթ օրը հատուկ փակ երեկույթի ժամանակ, որին կմասնակցեն միայն շոու բիզնեսի էլիտայի ներկայացուցիչները, ինչպիսիք են՝ Էնթոնի Հոփքինսը, Թոմ Հենքսը և այլք:

Ջոլիից բացի, նման մրցանակի կարժանանան իր գործընկերներ Սթիվ Մարտինը, Էյնջելա Լենսբարին և իտալացի դիզայներ Պիեռո Տոսին:

Փորձագետները սա անվանում են «Օսկարի» սեզոնի մեկնարկ:

38-ամյա Ջոլին ասել է, որ ինքը միանգամայն զարմացած է որոշումից: Նրա մրցանակը կրում է Ջին Հերշոլթի մարդասիրության պարգև անվանումը: Նախկինում դրան են արժանացել Էլիզաբեթ Թեյլորը, Փոլ Նյումանը և այլք:

Ներկայում Ավստրալիայում ֆիլմ նկարահանող Ջոլին ասել է, որ իր համար պատիվ է աշխատել հանուն մարդկանց իրավունքների:
 

Ջոլին իրական «Օսկար» էր ստացել 2000-ին` «Աղջիկը, որին ընդհատեցին» ֆիլմում իր դերակատարման համար: