Google-ը, Facebook-ը և Apple-ը կոչ են արել ԱՄՆ-ին դադարեցնել տվյալների հավաքագրումը

Ամերիկյան առաջատար տեխնոլոգիական ընկերությունները կոչ են արել ԱՄՆ-ին դադարեցնել հատուկ ծառայությունների կողմից տվյալների հավաքագրումը: Ինչպես գրում է The Financial Times-ը, համատեղ դիմումի հեղինակներն են Apple-ը, Google-ը, Microsoft-ը, Yahoo-ն, Facebook-ը, Twitter-ը և AOL-ը:

Ինչպես փոխանցում է gazeta.ru-ն, ընկերությունները նամակում մի շարք սկզբունքներ են բերում, որոնց պետք է հետևեն կառավարությունները: Ինչպես նշում է թերթը, դիմումը հասցեագրված է ողջ աշխարհի իշխանություններին, սակայն հատկապես ԱՄՆ-ն է առաջատար համացանցում վերահսկողություն և օգտատերերին հետևելու գործողություններ իրականացնելու իր հնարավորություններով:

«Ներքոստորագրյալ ընկերությունները հասկանում են, որ կառավարություններին անհրաժեշտ է միջոցներ ձեռնարկել իրենց քաղաքացիների անվտանգությունն ապահովելու համար, սակայն մենք վստահ ենք, որ ներկայիս օրենքները և պրակտիկաները հարկավոր է բարեփոխել»,- ասված է նամակում:

Ընկերությունները նաև պահանջում են, որպեսզի տվյալ հարցերով դատական որոշումները լինեն հրապարակային: