Չինացի հաքերները համացանցում են տեղադրել հյուրանոցների 20 մլն այցելուների անձնական տվյալներ

Բազմաթիվ չինացիներ, որոնք դիմել են զբոսաշրջային հյուրանոցային համալիրների ծառայություններին, դարձել են անհայտ հաքերների զոհը, որոնք նրանց անձնական տվյալները հրապարակել են համացանցում։ Միջադեպի հետևանքով մոտ 20 մլն մարդ է տուժել, հայտնում է newsru.com-ը՝ վկայակոչելով SecurityLab-ին։

Նախկինում անհայտ խմբավորումը, որն իրեն անվանում է «harbours of evil goods», հասանելիություն է ստացել երկրի մի քանի խոշոր հյուրանոցային ցանցերի տվյալների բազային։

The South China Morning Post պարբերականի տվյալներով` կայքը, որտեղ տեղադրված են եղել գողացված տվյալները, ներկայում անհասանելի է։ Սակայն ամբողջ տեղեկությունը հասանելի է այլ ծառայություններում։

Գողացված տվյալներում հասանելի են անուններ, հեռախոսահամարներ, էլեկտրոնային փոստի հասցեներ, բնակության հասցեներ, ինչպես նաև մանրամասներ պատվերների և համարների ամրագրման իրականացման մասին։