Բելգիայում դասախոսներն անօդաչու թռչող սարք են ստեղծել արտագրությունները կանխելու համար

Բելգիական Մեխելեն քաղաքի Թոմաս Մորի անվան քոլեջի դասախոսներն ստեղծել են հատուկ անօդաչու թռչող սարք, որի միջոցով քննությունների ժամանակ կկանխվեն արտագրության դեպքերը: Ինչպես տեղեկացնում է Russia Today-ի ռուսական ծառայությունը՝ համացանցում հայտնված տեսանյութում երևում է, որ քննության ժամանակ շարքերի վրայով անցնում է անօդաչու սարքը, որին տեսախցիկ է ամրացված, իսկ դասախոսը պլանշետի միջոցով ղեկավարում է թռիչքը:

Դասախոս Թոմ Ռումսը նշել է, որ տեխնոլոգիաների ներկայիս մակարդակը թույլ չի տալիս ստեղծել անօդաչու թռչող սարքեր, որոնք կարող են արդյունավետ աշխատել քննությունների ժամանակ: ԱԹՍ-ները կարող են օդում գտնվել միայն 15 րոպե, ինչից հետո պետք է միանգամից վերալիցքավորվեն, իսկ քոլեջներում քննությունները կարող են ժամեր տևել:

Մյուս խնդիրը սարքի աղմկոտ լինելն է: Այն նաև քամու ուժեղ ալիքներ է բարձրացնում, ինչի հետևանքով գրիչները և թղթերը տարբեր կողմ են նետվում: